Negosyante gipahimangnoan

CEBU – Giawhag ni Konsehal Emiliano Rosal sa dakbayan sa Mandaue ang mga negosyante sa maong dakbayan nga susihon nila pag-ayo ang kahimtang sa mga dapit nga tarokan sa ilang negosyo sa dili pa magsugod niini.

Si Rosal mipasabot nga aron dali rang makasugod sa negosyo ang usa ka negosyante, kinahanglang mosusi kini ngadto sa city planning office.

Kini tungod kay ang maong opisina maoy suhito kaayo sa matag lugar sa dakbayan nga angayan sa negosyo.

Miingon si Rosal nga kun dili makigdugtong sa taga city planning office ang usa ka negosyante, kasagaran kanila malangay sa pagsugod sa negosyo ilabi na kun ang dapit nga   mapili para sa mga kabalayan o residential ug dili commercial.

Midugang si Rosal nga gawas sa taga city planning office kinahanglang makigdugtong usab ang usa ka negosyante sa kapitan sa barangay sa lugar nga napili niya aron sultihan siya kun mosaler ba ang iyang negosyo dihang dapita. – BANAT NEWS