Midapig vs. slot machine operator

CEBU - Giinsister ni Cebu City Councilor Sylvan Jakosalem nga nalatid sa balaud ang paglukat og mayor’s permit sa usa ka operator og slot machine subay sa bag-ong balaod.

Kini human ikiha si Mayor Tomas Osmeña uban kang City Attorney Rodolfo Golez sa Waz Lian Management Philippines Incorporated (WLMPI) ug sa Myall Group Limited (MGL) tungod sa pagpasira niini sa slot machine operation diha sa Rajah Park Hotel niadtong Septembre 19.

Gawas sa pagdemanda og kapin sa P2 milyones nga danyos, gipangayo usab sa slot machine operator sa korte nga ibalik ang operasyon sa nahisgutang matang sa pasugalan.

Gipasabot sa mga reklamante nga ang casino nga maoy nagdumala sa slot machine diha sa Rajah Park giingong gi-operate sa Pagcor.Gitataw sa petitioner nga ang Pagcor base sa Presidential Decree 771 wala na manginahanglan og permit gikan sa mayor pag-operate og slot machine.

Apan matud ni Jakosalem nga dunay bag-ong balaud nga naaprubahan niadtong miaging tuig nga nag-amendar niini.

Ang konsehal nga maoy chairman sa Committee on Games, Amusements and Sports sa City Council nitumbok sa Akta Republika 9487 nga nag-usab sa Pagcor Charter.

Partikular nga gitumbok ni Jakosalem mao ang tipik sa Section 10 sa nahisgutang balaud may kalabutan sa Nature and Term of Franchise.

“It is clearly states that the operation of slot machine and other gambling paraphernalia and equipment shall not be allowed in establishments open or accessible to general public unless the site of these operations are three star hotel and resort accredited by the Department of Tourism authorized by the corporation (Pagcor) and by the Local Government Unit (LGU) concerned,” sumala ni Jakosalem.

Wala na i-renew ni Osmeña ang permit sa slot machine operation sa Rajah Park tungod kay wala makadani og mga turista. (BANAT)