Babayeng HRM student giluba sa managpuyo

CEBU – Nagtingkagol sa karsel sa kapulisan sa Cebu City Police Office ang mag-live-in-partner nga nursing student nga giingong nagtinabangay pagdunggab sa ilang bisitang ilang gikainom sulod sa ilang lawak nga giabangan diha sa may Holy Family Village MJ Cuenco barangay Banilad ning dakbayan niadtong Sabado sa alas 9:00 sa gabii.

Ang mag-live-in partner giila sa kapulisan nga sila si Pete Fredrich Acedillo, 26, nursing student nag-abang og lawak sa nahisgutang lugar ug lumad nga taga Villa Verna barangay Bulacao, Talisay City ug kapuyo niining si Julie Ann Shaira Tan, 19.

Ang duha maoy gitumbok nga mikulata ug midunggab sa tinun-an sa kursong Hotel and Restaurant Management nga si Jessel Tipon-Tipon, 19, taga barangay San Roque ug lumad nga taga barangay Oba-ob, Bantayan Island.

Base sa report sa Homicide Section sa Cebu City Police Office gikatahong nag-inom ang manag-live-in-partner sulod sa ilang lawak uban ang biktima, ang team leader sa mga imbestigador nga si SPO1 Rogelio Nedamo modumili sa pagluwat og pamahayag kabahin sa nahitabo. Apan sa wala pa matinong hinungdan gikatahong gitabangan nila og kulata ang bisita ug pagkahuman gidunggab og kutsilyo ang kalawasan niini ingon man sa ulo, sila ra usab ang gikatahong midala kaniya ngadto sa Vicente Sotto Memorial Medical Center.

Diha gihapon sa maong tambalanan si Tan madakpi sa mga polis apan ang iyang live-in partner niini wala maabti apan nianang pagka-kaadlawon nitahan gihapon sa mga polis.

Si Acedillo gipatambalan usab sa mga sakop sa homicide section kagahapong adlawa human usab kini adunay mga samad diha sa iyang kamot.

Wala pa maistablisar sa kapulisan ang tinuuray’ng motibo sa maong pagpanunggab. Nakuha sa kapulisan ang mga ebidensya nga gilangkuban sa kutsilyo, nagkadugong kutsilyo diha sa crime scene lakip na ang botelya sa beer nga ilang giinom. – BANAT NEWS