Soc may kasong sibil

CEBU - Kasong sibil ang giatubang ni Mayor Socrates Fernadez sa Talisay City gumikan sa kapakyas niini pagbayad sa usa ka pribadong luna nga gigamit para sa karsada sa dakbayan.

Kauban ni Fernandez nga nag-atubang sa susamang kiha mao ang mga kadagkoan sa Department of Public Works and Highways (DPWH).

Matud pa ni Emmanuel Larita kinsa maoy iredero sa magtiayaong Benigno Larita ug Cornelia Briones, nga maoy tag-iya sa yuta nga may gidak-ong 1,065 metro kuwadrado nga nahimutang sa barangay Linao, Talisay nagkanayon nga wala gyud magtagad ang administrasyon ni Mayor Fernandez ning maong problema sulod na sa kapin usa ka tuig.

Ang maong yuta gitadlasan sa barangay road nga nagdugtong sa mga barangay Antipolo, Linao ug Maghaway.

Si Larita nga gibati og kahiubos, midangop kang Konsehal Alan Bucao, sa iyang pagtuo nga mao ra kini ang bugtong konsehal sa dakbayan nga dali kaayong kapangayoan og tabang sa mga mamumuhis nga may suliran.

 Hinuon si Bucao kinsa nasayod nga wala makatambong si Talisay City Legal Officer Atty. Owen Algoso sa una ug ikaduhang mediation board hearing kabahin sa reklamo ni Larita miingon nga makigkita siya kang Algoso.

Ang kasong sibil ang naduso na ni Larita ngadto sa RTC branch 21 nagtumbok sa mga respondente niini nga mao sila si Mayor Fernandez ug mga opisyal sa DPWH.

Ang pagkalambigit sa DPWH ning maong kaso nahimo, tungod kay mao kini nagtrabaho sa maong karsada diin ang yuta sa mga Larita, nahilakip.

Si Larita nangayo og bayad sa ilang luna niadto pang buwan sa Abril sa milabay’ng tuig apan hangtod karon wala pa gyud siya bayri. Banat News