Kano nga nag-'dirty finger' gipatay

Gumikan lang sa pagsenyas “f—k you” usa ka Amerkanong beterano sa Iraq ang gipusil patay sa gwardiyang magbalantay sa compound nga gipuy-an niini kagahapon sa kaadlawon diha sa Calderon Compound, Banawa barangay Guadalupe ning dakbayan.

Ang namatay giila sa kapulisan mao si Myron Joseph Francois 57, taga 23121 Dr, Metairie, Louisiana, USA. ug temporaryong nagpuyo sa nahisgutang lugar.

Si Francois namatay diha-diha gilayon human makaangkon og samad pinusilan sa iyang dughan ug tuong bukton human pusila ni Charlie Pilapil Loon, 37, sakop sa Archangel Security Agency nga temporaryong nagpuyo diha sa A. Lopez St., barangay Calamba ning dakbayan ug lumad nga taga barangay Liong, Cataingan, Masbate.

Si Pedro Carampatan 53, driver sa Zarlene Taxi maoy ni-report sa kapulisan labot sa iyang pasaherong gipusil sa security guard.

Naabtan nalang sa   mga niresponding mga sakop sa Scene of the Crime Office (SOCO) ug mga   polis nga nagbuy-od na diha daplin sa dalan nga wa nay kinabuhi ang biktima.

Ang suspek mao pay nitawag sa kapolisan kabahin sa iyang nahimo sa biktima ug mitahan dayon sa iyang .38 service revolver nga may upat ka kabhang bala, ug duha ka buhing bala, samtang usa ka slug ang narekober diha sulod sa taxi ni Carampatan.

Sa imbestigasyon nila ni SPO2 Rey Cuyos ang suspetsadong si Loon nibutyag nga pipila ka minutos sa wala pa mahitabo ang pagpamusil gidapog sa biktima ang suspek.

Si Loon nga nahinabi sa mga tigbalita kagahapon nagkanayon nga makadaghan nang higayong siya trataron sa biktima susama niini, apan wala ra siya manumbaling ug misumbalik usab siya og komedya niini apan dihang siya nay nangomedya nasuko ang langyaw.

Sa miaging semana, samtang nagkaon sa usa ka kan-anan diha sa maong dapit ang suspek naagi ang biktima ug iya kining gisampit og “Hey Joe” apan nakugang siya sa tubag niini ug mipasangil hinuon kaniyang siya usa ka bayot, sa pagtuong pasiaw ra ang tubag sa biktima iyaha kining gibawsan nga ikaw maoy bayot, apan gikasuko na kini dayon sa langyaw.

Matud pa sa suspek dihang niabot luwan sa taxi ang maong langyaw iyang gilili kung si kinsay sakay niini apan gikasuko kini sa biktima ug mikanaog dayong kalit nga milambos sa duha niini ka bukton ngadto kaniya ug miingon nga usa siya ka polis sa ilang nasud ug iyang ireklamo ang gwardiya.

Human niini nibalik og sakay ang biktima apan dihang nigawas ang taxi gipara kini ni Loon aron pangutan-on si Carampatan kung unsay problema sa biktima kay nabuhat niya kadto apan nakugang siya nga diha gihapon sa maong taxi si Francois maong iyaha nalang untang pangutan-on. Apan dihang iyaha nang giablihan ang taxi gikatahong gisenyasan siya og -“f—k you” sa biktima tungod sa iyang kapungot iyaha kining gipusil, ang biktima midagan balik sa sulod sa compound apan nahagba una pa kaabot sa ilaha.

Dunay mga residente sa dapit sumala pa ang nakadungog nga nigawas pa sa baba sa biktima ang pulong nga “I’m sorry” una pa kini nahagba.

Ang uyab niini nga si Maylyn Alod nitug-an sa Banat News nga ang iyang fiancée miabot dinhi niadtong Disyembre 14 sa miaging tuig.

Matud niya nga may gipamating Post Traumatic Stress Syndrome ang biktima gumikan sa kasinatian niini sa Iraq. Sa pagkakaron nagpaabot nalang kini og tawag sa ilang nasud tungod kay nangaplay kini og sheriff didto.