Lola gisaka sa balay gipatay

Gisaka sa balay ug gipusil-patay ang usa ka 60-anyos nga babaye sa tulo ka mga armadong lalaki diin usa kanila gidudahan nga iya rang kaugalingong pag-umangkon diha sa bukirang bahin sa barangay Anislag lungsod sa Pinamungajan niadtong Domingo sa alas 5:00 sa hapon.

Ang biktima mao si Buenaventura Belleta, 60, buwag na sa bana ug molupyo sa nahisgutang lugar samtang ang gidakop nga suspek mao ra usab ang iyang pag-umangkon nga si Veronico Baloro, 48, nagpuyo usab sa maong dapit.

Matud pa ni PO2 Salvador Samillano sa Pinamungajan Police dihang nahinabi sa Banat News gidakop nila ug gibalhug sa bilanggoan ang suspek human kini positibong gitudlo sa 9-anyos nga apo sa biktima nga nagtumbok kaniya usa kini sa tulo ka mga suspek.

Si PO2 Samillano nagkanayon nga ang bata atol sa gihimo nilang pagsukit sukit mitug-an nga nakakita siya sa iyang paglili sa bintana sa iyang uyoan nga kuyog sa laing duha ka lalaki dihang   nisaka sa ilang balay niadtong higayuna.

Apan ang uyoan gikatahong wa  mokuyog sa pagsaka sa duha ka wala mailhing lalaki ug nagpabilin kini diha sa gawas.

Pag-abot sa taas, ang duha ka lalaki gidiretso pagpusil ang tiguwang kinsa niadtong tungura nagluto sa ilang panihapon ug dihang natumba na kini nakamatikod ang duha sa presensya sa bata.

Dihang ila untang gipunting ang 9-anyos abtik kaayo ang naulahi sa pag -ambak sa bintana ug nagligid ligid sa walog ug daling nakapangayo og tabang sa ubang mga silingan.

Hinoon hugtanong gihimakak sa nasikop nga suspek ang maong pasangil nga paglambigit kaniya sa krimen.

Patay diha-diha ang biktima dihang naabtan sa mga silingan samtang nisibat ang duha pa ka mga suspek nga gikatahong maoy misaka sa balay ug nipusil sa tiguwang, bugtong si Baloro lang ang gidakop tungod sa positibong pagtumbok kaniya sa 9 anyos nga saksi.

Subay sa inisyal nga imbestigasyon sa kapolisan ang panagbangi sa yuta sa pamilyang Belleta maoy gituohan nga posibleng motibo sa krimen human makahipos usab og report ang kapulisan nga namaligya og yutang wala pa mabahin-bahin sa tibuok banay ang biktima sa nilabay'ng bulan.