Polis sa Talisay imbestigahon – Perigo

Gipaubos na sa imbestigasyon ang polis sa dakbayan sa Talisay nga giingong wala moayuda sa pamilya sa duha ka babayeng gi-chopchop dihang sila miduol aron magpatabang niadtong wala na nila igkita ang duha.

Ang gipatay ug giputol-putol ang mga lawas mao sila si Maria Eva Mae Peligro ug Gwendolyn Balasta kansang mga parte sa lawas gisulod og plastic bag ug gibuwag-buwag og labay sa mga bukirong barangay sa Minglanilla, dakbayan sa Naga ug Talisay.

Si Supt. Romeo Perigo nagkanayon nga gikuhaan na nila og pamahayag si Joshua Ybañez, bayaw ni Peligro kinsa maoy niduol sa Talisay PNP aron magpatabang.

Si SPO2 Jose Noel Factores kinsa maoy duty desk officer niadtong Hulyo 25, 2008 maoy gikatahong niatubang sa pamilya.

Dihang mianha ang pamilya nila ni Peligro ug Balasta sa police station nagpa-blotter kini kabahin sa pagkawagtang sa duha.

Gibutyag sa hepe nga kung mapamatud-an nga si Factores dunay kalapasan ug nasakop pa sa gahom niya isip hepe niini ang paghatag sa silot temporaryong putlan kini og mga prebilihiyo, ug uban pa lakip na ang pagkasuspenso gikan sa 10-15 ka adlaw.

Ang kapolisan sa lungsod sa Minglanilla ang unang naka-recover sa parti sa putol sa lawas sa mga biktima sa barangay Campo 8 diin ang maong lugar sakop sa maong lungsod.

Kabahin sa pagkadawat og pasidungog sa Minglanilla PNP sa daling pagsulbad sa nahisgutang krimen si Perigo nagkanayon nga: “I think there is nothing wrong with what happened, the crime was first discovered by Minglanilla police in Campo 8, and we put under arrest the suspects, our part we had sent our investigator to help Minglanilla police, I think we have done our part in solving the crime.”