Suspek sa 'chop ladies' ibalhin sa Maghaway

Gikatakda kagahapon sa hapon ang pagdala sa tulo ka suspetsado sa pagtagod-tagod sa duha ka babaye  ngadto sa korte aron pormal na nga maduso ang kaso batok kanila ug aron ikabalhin na sila ngadto sa prisohan sa  barangay Maghaway.

Ang hepe sa kapolisan sa dakbayan Superintendent Romeo Perigo mibutyag kagahapon sa Banat News nga higpit niyang gipabantayan ang detention cell diin sila si Joseph Roy Cellar delos Reyes, Richard Gudelosao ug Jean Antonette Medalle temporaryong gidetiner human sila sugdi og imbistigar diha sa buhatan ni Talisay City Prosecutor Marshal Rubia niadtong Martes sa hapon.

Matud ni Supt. Perigo  nga gihuwat na lang nila nga mahuman ang  “information sheet” sa maong kaso diha sa buhatan ni Rubia aron ang tulo madala na ngadto sa korte.

Ang hepe mibutyag nga usa ka team nga naglangkob sa walo ka tawo, walay labot sa upat ka arresting officers, maoy mobantay sa tulo paingon ngadto sa korte aron makontrolar ang mga tawo nga mohamag ug  mopasakit kanila.

Niadtong Martes sa pagpahigayon sa inquest proceeding daghang  mga tawo kinsa misimpatiya sa mga pamilya nila ni  Maria Eva Mae Peligro ug sa ig-agaw niining si Gwendolyn Balasta kinsa maoy gitagodtagod sa maong mga suspetsado, nagpaninggit nga pasilotan silag kamatayon.

Human sa inquest hearing wala kapugngi sa usa ka paryente sa biktima ang pagdapog sa mga suspetsado dihang nanggawas na kini gikan sa buhatan ni Rubia.

Si Supt. Perigo  midugang nga misimpatiya sila sa mga paryente sa mga  biktima ug hugtanon silang mohatag sa ilang tabang sa maong kaso aron masilotan ang mga suspetsado.

Sa laing bahin, laing parti sa lawas na usab ang nakit-an niadtong Martes sa gabii diha sa sitio Camp 5, Manipis, dakbayan sa Talisay.

Ang kapitan sa maong barangay Joselito Laurente maoy mitaho sa kapolisan kabahin niini.

Si PO2 Lino Diez, polis sa dakbayan daling miresponde sa maong taho ug nakuha  niini ang usa ka paa nga giilugan na sa mga iro  nga gituohang iyaha ni Balastas.