PNP detachment tukoron sa Mabini

Paningkamotan sa kapolisan sa dakbayan sa Sugbo nga makapatukod og Police detachment didto sa Barangay Mabini aron makatabang sa pagpatunhay sa kahapsay ug kalinaw sa maong lugar.

Kini maoy giklaro ni Sr. Supt. Patrocinio Comendador, hepe sa Cebu City Police Office (CCPO) isip reaksyon sa giluwatang pamahayag ni Konsehal Gerry Carillo kinsa mimandar nga patukoran gyud og out post sa CCPO ang maong dapit human sa nahitabong pagpangrakrak niadtong Domingo.

Nasayran nga  didto sa Sitio Loton sa nahisgutang barangay, ang sakop sa Security Service Group (SSG) nga si SPO2 Venerando Villaban deriyot mapatay human rakraki sa armas sa usa ka guwardiya nga si Reynaldo Altar sakop sa CSIS Security Agency.

Matud pa ni Comendador nga iyang paningkamotan nga makatukod og out post sa SSG sa nahisgutang dapit aron usab dili na masubli ang maong hitabo.

Gipadayag niya nga ang pagtukod unta og detachment didto, gimbuhaton unta kini sa mga lokal nga opisyal ug igo lang sa pagbutang og mga polis ang Philippine National Police (PNP).

Tungod niini gimanduan dayon ni Comendador  ang hepe sa SSG nga si Sr. Inspector Eleseo Castronuevo nga padestinohan gyud og mga polis ang nahisgutang lugar.

Nasayran nga si SPO2 Villaban nakaangkon og  mga pangos sa iyang lawas dihang naligid sa bung-aw sa pagsalbar sa iyang kinabuhi gikan sa mga nag-aso-aso nga mga bala sa armas  ni Altar.

Si Altar ug ang kauban niini nga si Arnado Talisic, 47, kinsa pulos trabahante ni Rolando Seno,  nasikop dayon sa kapolisan.

Kahinumduman nga ang pamilya nila ni Seno ug Teodoro Adarna Jr. dugay nang nagkabangi gumikan usab sa ilang mga yuta diha sa barangay Mabini.