Naglibog sa text naghikog

Gumikan sa text message usa ka babayeng katabang milayat sa pangpang-patay diha sa Fabro Hills barangay Pusok dakbayan sa Lapulapu kagahapon sa buntag.

Ang namatay mao si Cerila Gerda Campillo, 27, lumad sa barangay Consuelo lungsod sa Consuelo, Isla sa Camotes ug nagserbisyo isip katabang sa pamilya ni Dr. Zocorro Bandong sa maong dapit.

Matud pang Bandong katapusan nilang panagkita ni Campillo sa milabay’ng gabii human kini misugat kanila sa pag-abli sa gate ug pagpaluto niini og bulad.

Gikatahong pipila na ka adlaw ilang naobserbahan nga problemado kini matud pa ni Bandong nga sa dihang iya kini gisita si Campillo kini mitug-an nga naglibog na siya kung unsay iyang itubag sa mga text messages sa lalaking naninguha kaniya.

Giangkon ni Bandong nga siya ang nagtupotupo sa usa ka lalaking golf caddie ngadto kang Campillo gumikan kay naguol kini nga duol na usa ka tuig kini nga nagserbisyo sa iyang poder apan wala pa kini nakauyab.

Dugang pa ni Bandong nagsugod og problema si Campillo sa dihang kanunay nang mohangyo kaniya ang lalaki (ngan gipugngan una) nga maligo og dagat apan wala mosugot si Campillo hinungdan nga kini kanunay nang maguol gumikan sa mga text messages nga madawat gikan sa maong lalaki.

Wala magdahom si Bandong nga buhaton niya kini. Nagtoo lang silang adto kini mihigda sa igsuon sa atbang apan nakugang nalang sila dihang nakit-ang patay na kini diha sa luyo sa ilang balay.

Si Campillo nakit-ang patay nga bali-bali ang kabukugan sa luyo sa ubos sa balay ni Bandong nga may gilawmong 15 ngadto sa 20 ka tiil ug gidudahan nga kini milayat ug nagpakamatay.

Sa milabay’ng Domingo si Campillo uban sa duha ka igsuong babaye ug lalaki nanagkot og bali og P500 nga kandila ug gihulagway nga dugay kini kaayong nahuman sa pag-ampo diha sa simbahan sa Birhen sa Regla.