CAFGU nakapusil sa Tuburan

Gipangita na sa kapolisan sa lungsod sa Tuburan ang kanhi sakop sa Citizen Armed Forces Geographical Units (CAFGU) human makapusil sa usa ka mag-uuma niadtong nilabay’ng adlaw didto sa barangay Libo.

Ang akusado  giila sa kapolisan nga si Renante Montebon, hingkod ang panuigon nga taga barangay Montealegre sa nahisgutang lungsod kinsa usa kanhi ka miyembro sa Cafgu nga nadestino sa maong barangay.

Si PO3 Romel Bancog sa Tuburan Police Station miila usab sa biktima nga si Martin Bonita, 39, taga barangay Libo.

Nasabak kini sa iyang dughan ug milapos sa  wala niyang bukton ang bala.

Matud pa ni PO3 Bancog nga wala pa matino ang armas nga gigamit sa suspetsado sa pagpusil sa biktima ingon man ang motibo niini.

Matud pa ni PO3 Bancog nga nagpadayon karon ang ilang pagpangita sa suspetsado pinaagi sa pagsuhid  sa  mga dapit nga posibling taguan niini.

Sumala pa ni PO3 Bancog  nga maglisod sila sa pag-establisar sa motibo  kay ang duha ka mga kauban sa suspetsado wala pa usab nila mailhi ug wala usa'y laing  makasulti bahin sa maong nahitabo.

Gitataw ni PO3 Bancog  nga ang biktima walay kontra sa ilang lugar kay maayo kining tawo.