Nangandoy mag-Army naghikog

Patay nang nakit-an ang usa ka 21-anyos nga ulitawo nga nangandoy’ng mag-Army  human maghikog ilawom sa kahoy nga santol gamit ang liston sa sapatos nga gihigot sa iyang liog ug gibaat sa sanga sa kahoy didto sa barangay Awihaw,  siyudad sa Toledo niadtong Martes sa alas 5  sa buntag.

Ang naghikog mao si Noel Villapando, 21, ulitawo ug nagpuyo ra usab sa nahisgutang lugar.

Ang mga silingan ug paryente na ni Villapando maoy nakadiskobre nga nagbitay na kini ilawom sa kahoy nga santol dili layo sa ilang balay nianang pagmata nila pagkabuntag nga nagdiwalwal na ang dila ug miaksyon na og kalagom.

Sa pagresponde sa kapolisan nakahipos kini og suicide note nga gibutang diha sulod sa iyang pitaka nga anaa karon sa kapolisan aron magamit sa nagpadayon nga imbestigasyon pagtumbok sa motibo sa pagpakamatay niini.

Matud ni PO3 Benedicto Bobelis, imbestigador sa Toledo City Police Station sa dihang nahinabi sa Banat News ang inahan nga si Yolanda Villapando, mitug-an sa gihimo nilang pagsukit sukit nga nagkalalis sila sa iyang bugtong anak nianang pagkagabii hinungdan nga milakaw kini ug wala na mobalik. Nianang pagkabuntag nakit-an na lang kining naghikog patay ubos sa punoan sa santol dili layo sa ilang balay.

Dugang nahipos nga impormasyon sa kapolisan nga ang biktima nagplano unta kining mosulod pagka-Army human miundang sa iyang pagtungha isip 3rd year college sa kursong Criminology aron pagsunod unta sa iyang namatay nga amahan.

Dugang nahipos nga impormasyon nga ang amahan ni Villapando usa kini ka Army kaniadto nga namatay sa ambush didto sa Mindanao.

Ang mga paryente ni Villapando ug mga silingan mihulagway nga buotan ug hilomon kini nga pagkatawo ug gikahibulong nila og dako nga nakit-an na lang nila kini nga naghikog patay.

Ang patay’ng lawas niini gitakdang ipaubos sa autopsy aron pagtino sa hinungdan sa pagpakamatay niini.