Gobiyerno uyon sa usbaw sa plitehan

Ang kagamahanang nasyonal ang posibleng moaproba sa P1.00 nga usbaw sa plitehan sa mga jeepney ug bus ug sa P10 nga “add-on” sa plitehan sa taxi matud sa usa ka opisyal sa milabay'ng adlaw.

Ang tsirman sa Land Transportation and Franchising Regulatory Board (LTFRB) Thomas Lantion nagkanayon nga wala siya’y nakitang rason nga dili patas-an ang plitehan diin nagsige og saka kada semana ang presyo sa lana.

Matud niini nga ang LTFRB pabor sa P1 nga usbaw sa minimum nga plitehan sa mga jeepney ubos sa unang upat ka kilometro ug dugang nga 0.25 sa matag usa ka kilometro nga gilay-on.

Si Obet Martin ang presidente sa  jeepney transport group nga “Pasang Masda” nagkanayon nga ang transport group nagkauyon nga dili mangayo og usbaw kung mo-rollback ang presyo sa gasolina ngadto sa P36 kada litro.

Si Lantion mibutyag nga ang LTFRB misumiti sa maong rekomendasyon ngadto sa National Economic and Development Authority (NEDA) Board ug gilauman nila ang desisyon sulod sa napulo ka adlaw o sa dili pa matapos niining buwana.

Ang usbaw sa plitehan ang gilaumang mapatuman sa mosunod nga buwan.