Mando sa DepEd walay epekto

Walay epekto sa Cebu City Schools Division ang kamanduan sa Department of Education (DepEd) labot sa mga oras nga igahin sa mga magtutudlo alang sa actual classroom teaching niini.

Ang DepEd Memorandum Number 291 naglatid nga unom lang ka oras ang gikinahanglan sa mga school teacher sa ilang pagtudlo matag adlaw.

Gitataw hinoon sa maong memorandum nga dili exempted ang mga magtutudlo sa walo ka oras nga workday nga nalatid usab sa balaud.

Ang nahabiling duha ka oras gamiton sa mga magtutudlo alang sa pagpriparar sa ilang lesson plan, action plan, instructional materials, evaluation/assessment, monitoring ug uban pa.

Apan alang kang City Schools Division Superintendent Doctor Rances, walay bag-o sa nahisgutang memorandum tungod kay dugay na nilang gihimo ang maong buhat.

“Wala may bag-o ana kay mao man na ang among gihimo kaniadto pa, 360 minutes a day ra man gyud ang actual teaching workload sa atong mga magtutudlo,” sumala ni Rances.

“Kanang nahabilin nga duha ka oras, mao man gyud na ang tinghimo sa atong mga magtutudlo sa ilang mga lesson plan ug unsa pa na diha,” dugang pasabot ni Rances. Nagtoo hinoon ang City Schools Division Superintendent nga ang memorandum gitumong lang sa mga magtutudlo didto sa kauluhan.

Kini tungod kay giingong tulo ka shift ang klase sa mga tinun-an sa ubang publiko nga mga tunghaan didto sa Metro Manila.