Lapu' SWAT van "coincidence" ra

Gidepensahan ni Lapulapu City Police Office Director Supt. Loiue Oppus ang iyang mga tawo nga luwan sa SWAT van nga nasigpatan sa lungsod sa Minglanilla 15 minutos human gibanhigan patay si Ricoly Igoy sa barangay Pakigne sa milabay'ng hapon.

Base sa pamahayag sa lima ka mga personnel sa SWAT team ug Operation Section sa kapolisan sa dakbayan sa Lapulapu nga igo lamang sila nangaon sa lungsod sa Minglanilla human sa ilang pagtambong sa hearing sa dakbayan sa Talisay.

 Base sa nakuha nga report sa Banat News gikan sa police blotter sa kapolisan sa dakbayan sa Lapulapu nasayran nga ang luwan sa maong SWAT van mao sila ni PO3 Jomar Ybañez, PO3 Jupiter Nurab, PO1 Junrey Batobalonos, mga sakop sa operation section ug ang duha ka SWAT team nga si PO2 Roberto Pepito Jr. ug PO2 Edmund Melendres.

 Matod pa sa maong mga PNP personnel nga gikan sila sa usa ka hearing sa MTCC sa dakbayan sa Talisay diin adunay kalambigitan sa pagpusil patay ni Customs Deputy Collector for CPCO Jason Alcantara.

 Human sa pagdungog sa maong kaso nakahukom sila nga mangaon sa lungsod sa Minglanilla gumikan kay udto na ug nindot usab ang pagkaon sa maong dapit.

Sa ilang pagbalik ilang nalabyan ang lugar nga nahitabuan sa biktima apan wala sila makahibalo nga si Icoy ba diay ang gipusil sa maong dapit ug sa dihang ila usab nga nakita nga duna nay mga pulis sa maong dapit hinungdan nga sila mideretso nalang sa pagpauli sa dakbayan sa Lapulapu.

 Subay niini dako ang pagsalig ni Oppus sa iyang mga tawo sa SWAT team ug sa Operation Section sa kapolisan sa dakbayan sa Lapulapu hinungdan nga wala siyay pagtoo nga nalambigit ang iyang mga sakop sa kamatayon ni Igoy. Ang nahitabo usa lamang ka “coincidence” o timing lang nga nakalabay sila sa maong dapit diin gibanhigan patay si Igoy. (Bong Soriano)