Usa ka gidudahang drug pusher ug gidudahang kustomer niini ang gidakop sa mga sakop sa Regional Anti-Illegal Drugs Task Force Group-7 niadtong milabay'ng gabii atol sa buy-bust operation diha sa barangay Sambag 2 dili layo sa barangay hall sa maong lugar.
Ang gidakop giilang sila si Soliman “Eman” Pioquinto, residente sa maong dapit ug Mark Edsel Tionson nga taga dalan P. Del Rosario.
Si PO3 Richard Valencia sa RAIDSOTFG nga gihinabi sa Banat News nitug-an nga bag-uhay pa sa maong negosyo diha sa maong dapit si Pioquinto apan gikatahong nabaniog na ang binuhatan niini tungod kay sagad sa mga kustomer niini mga tinun-an.
Matud pang Valencia base sa nakuha nilang report gibana-banang duha ngadto tulo ka bulto ang mabaligya sa suspek matag adlaw tungod sa kadaghan sa mga parokyano niining moanha sa ilang balay. Giingong nakadawat og suwat reklamo ang mga polis kabahin sa operasyon ni Pioquinto.
“Tag duha hangtud tulo ka bulto ang mabaligya niya kay duol man gud sa mga boardinghouse. Usually mga estudyante ang iyang mga kustomer,” asoy pang Valencia.
Gumikan sa report gipahigayon dayon ang buy-bust operation batok sa suspek apan human kini mitunol og usa ka paketeng shabu diha sa poseur buyer nakamatikod kining polis misuway og dagan ug misulod sa balay apan naabtan kini diha sa sulod.
Diha sa sulod naabtan usab si Tiongson nga gituuhang kustomer sa suspek ug nagpasad ang mga drug paraphernalia hinungdan nga kini giapil og sikop.
Atol sa pagsusi nakuhaan usab si Pioquinto og 97 ka paketeng pulos dunay sulod nga gidudahang shabu lakip na usab ang usa ka paketeng nakuha sa mga polis sa buy-bust.
