Lokal nga playboy magazine babagan

Babagan sa Cebu City Anti-Indecency Board (CAIB) ang gitakdang pagpagawas sa “local version” sa Playboy Magazine nga gitakdang ipagawas sunod semana.

Matud ni CAIB Chairman Dr. Rene Josef Bullecer nga mohimo sila og lakang pagpugong niini tungod kay kini ilang gikonsiderar nga malaw-ay'ng basahon.

Nagkanayon si Bullecer nga ubay-ubay na ang hilas nga mga magazine nga gipamaligya lakip na dinhi sa Sugbu, ug sila dili gusto nga kini madugangan pa.

“Daghan na ta og locally produced nga mga magazine nga para nako hilas ba unya pun-an pa gyud nato nga sayod na man ta kung unsa na nga matang sa magazine,” sumala ni Bullecer.

Sa pikas bahin, giawhag ni Bullecer ang katawhan nga mupadala og suwat ngadto kang Presidente Gloria Macapagal Arroyo nga magpadayag og pagsupak sa nahisgutang magazine.

Partikular nga gidasig sa CAIB Chairman mao ang mga Sugbuanon ilabi na ang mga ginikanan nga nagtan-aw sa kaugmaon sa ilang mga anak.

Nagtuo si Bullecer nga maminaw ang presidente sa sentimento sa katawhan ilabi na nga gitay-og karon ang iyang administrasyon sa mga kontrobersiya.

“I hope that they will start writing the president and with Secretary Cerge Remonde I’m sure that they will act on this before mugawas ang magazine next week,” matod ni Bullecer.

Gitataw hinuon sa CAIB chairman nga kun dili nila mapugngan ang pagpagawas sa Playboy Magazine, ilang siguruhon nga kini dili makasulod dinhi sa dakbayan.

Kini sama usab sa ilang gihimo sa mga malaw-ay'ng basahon nga gipangsakmit, subay usab sa ilang pagpatuman sa Anti-Indecency Ordinance sa siyudad.

Gipahibawo ni Bullecer nga subli nilang gihingusgan ang ilang kampanya batok sa pornograpiya lakip na sa malaw-ay'ng mga basahon. Gani niingon ang CAIB Chairman nga sila nagpatabang na sa mga opisyales sa kabarangayan lakip na sa kabatan-unan pagpalapad sa ilang kampanya.