2 ka tinun-an nanulis sa drayber

Nagtingkagol na karon sa karsel sa kapolisan ang duha ka mga tinu-an sa Lahug Night High School  tungod sa pagtulis  usa ka taxi driver niadtong Domingo sa kaadlawon diha sa  dalan Molave barangay Kamputhaw ning dakbayan.

Ang duha ka mga tulisan  nga  pulos mga third year high school sa nahisgutang eskwelahan giila sa Theft and Robbery Section nga sila si Antonio Suerte Jr. 18,  taga Gorordo  avenue, barangay Lahug, ug Michael Rosales 18,   taga Barangay  Kamputhaw.

Samtang ang ilang gibiktima mao si Alexander Lañojan, 38,  Taxi driver sa Eistrup taxi, residente sa Tres de Abril barangay Punta Princesa.

Base sa   imbestigasyon sa TRS ang taxi driver nga si Lañojan gisakyan sa  duha ka  suspetsado kagahapon sa kaadlawon gikan sa  dalan F. Cabahug, Panagdait Mabolo ning dakbayan.

Matud pa niini nga samtang nagdagan ang iyang taxi subay sa nahisgutang lugar, pag-abot sa corner Molave ug Gorordo Avenue mideklarar  kini og tulis.

Ang suspetsadong si Rosales nagtion kaniya og kutsilyo   dungan sa pagkuha sa iyang pitaka samtang ang usa nga si Suerte maoy  migapos kaniya sa liog ginamit ang usa ka itom nga electrical wire nga may gitas-on nga usa ka metros.

Nakuha sa biktima ang iyang kinitaan nga P2,500 ug  usa ka dollar bill ug duha ka mga Argentina bill.

Human sa maong pagpanulis ang duha ka mga suspetsado daling  misibat padulong sa dalan Kamagong.

Ang biktima nga nakalingkawas  migukod sa duha ka mga  suspetsado ug nangayog  panabang sa mga barangay tanod sa Kamputhaw nga nag-roving hinungdan nga nahitabo ang ginukdanay ug nadakpan si Suerte human ma-corner ug nakuhaan sa kutsilyo.

Human masikop si Suerte gipahigayon gilayon ang hot pursuit ug  miresulta sa pagkasikop sa ikaduhang suspeck  nga si Rosales, ug nakuha sa posesyon niini ang kwarta nga mokantidad og  P1,100  ingon man ang usa ka dolyar ug duha ka Angentina nga dolyar.

Ang duha mag-atubang   og kasong pagpanulis nga ipasaka karong adlawa human sa paghikay sa kaso batok niini.