Manghod nga palahubog gitigbas sa maguwang

Gi-unay og tigbas sa maguwang ang manghod niini kinsa giingong walay buhat ug mopauli lang sa balay nga hubog ug maningil pa og kaon.

Ang maong insidente nahitabo sa Barangay Ilaya lungsod sa Ronda, Cebu niadtong adlaw'ng Martes sa gabii.

Ang biktima mao si Rex Gemagan, 20-anyos, ulitawo molupyo sa nahisgutang lugar samtang ang suspetsado mao ra usab ang iyang maguwang nga si Renato, 28, ulitawo.

Subay sa gihimong imbistigasyon ni PO3 Juan Capacio sa Ronda police station dihang nahinabi sa Banat News naghiwa og Nangka ang suspek nga ilahang ibaligya dihang niabot ang biktima nga hubog.

Naningil og panihapon ang biktima apan gitubag kini sa maguwang nga labing maayo unta og nagdala kini og pagkaon nga maoy hinungdan nga nasuko ang hingtungdan ug nanghagit og away sa suspek.

Matud ni PO3 Capacio na-atol nga nagunit sa sundang ang suspek nga maoy gigamit niya sa paghiwa sa Nangka hinungdan nga wala kini kapugong ug gitigbas ang biktima ug naigo ang ulo niini.

Daling gidala sa tambalanan ang biktima human sa hitabo samtang ang suspek boluntaryong nitahan sa iyang kaugalingon ngadto sa kapolisan.

Dugang nasayran nga patay na ang inahan niini ug ang ilaha nalang amahan maoy kauban sa ilang pinuy-anan tungod kay ang uban nilang igsoon nanarbaho ngadto sa Manila.

Hinoon gibuhi-an sa kapolisan sa Ronda ang suspek kagahapong adlawa human nipirma og waiver ang biktima nga dili nalang mopasaka og kaso batok sa iyang magulang. (Darrel A. Carumba)