Druglords vigilante style maningil sa pusher
Ang mga druglord karon mogamit na og bayolente ug linuog nga paagi pagkolekta sa ilang kinitaan ngadto sa mga street pusher sa shabu, sumala pa sa hepe sa Cebu City Police Office.
Kini nga reaksiyon ni Sr. Supt. Patrocinio Comendador iyang giluwatan tungod sa pagkabanhaw sa pinatyanay nga naglambigit sa giingong mga vigilante tungod sa gisul-ob nga “bonnet” sa mamumuno.
Apan sumala pa ni Comendador nga ang mga druglord karon naneguro nga makakolekta sa ilang kinitaan gikan sa mga drug pushers nga nagkatap sa kabaranggayan.
Gibutyag sa direktor sa kapolisan sa dakbayan sa Sugbo nga adunay kaugalingon kolektor ang mga druglord nga naglantaw sa mga lugar asa nagkatap ang ilang negosyo.
Nagduda si Comendador nga midangop sa bayolenting paagi sa pagpaningil ang mga druglord hinungdan nga adunay mga tawo nga gipamatay nga masota sa imbestigasyon nga nalambigit gyud sa negosyo sa ginadiling drugas.
Tungod niini, wala hatagi og gibug-aton ni Comendador ang pagduda ug kahadlok sa katawhan nga mibalik na usab ang mga vigilante aron pagtumba niadtong mga badlongon sa katilingban nga aduna nay mga rekord.
Kahinumduman,
Sa inisyal nga imbestigasyon sa Homicide Section, sumala pa ni Comendador, nasota nga panimalos ang hinungdan sa pagpatay kang Rafols gumikan kay adunay gipatay ang biktima sa maong lugar.
Wala usab nila isalikway ang pagtuo nga may kalambigitan sa ginadiling drugas ang pagpatay kang Rafols tungod kay sa pakisusi sa kapolisan, nasota nga nalambigit sa negosyo sa shabu si Rafols sa maong lugar.
Gimanduan ni Comendador ang Homicide Section sa pagpalawom sa imbestigasyon aron masota gyud ang tinuoray’ng motibo sa pagpusil patay kang Rafols.
Si Comendador mitataw nga naanad lang ang mga tawo nga motuo dayon nga binuhatan sa vigilante ang pagpatay kun ang mamumuno magsul-ob og bonnet.
Giklaro niya nga sukad sa iyang paglingkod isip direktor sa CCPO gisupak na niya ang extra-judicial killing nga mikalas na og dul-an sa gatus ka mga tawo.
- Latest
- Trending
