‘Not guilty’ – Pigon

Mi-plead not guilty si kanhi SPO1 Arnulfo Pigon sa kasong giatubang niini sa korte may labot sa pagpusil patay  kang kanhi Sta. Fe Mayor Rogelio “Dokdok” Ilustrisimo Sr. niadtong unang semana sa bulan sa Mayo sa milabay’ng tuig.

Atol sa arraignment sa sala ni Regional Trial Court Judge (RTC) branch 6 Judge Ester Veloso kagahapon sa alas 9 sa buntag wala angkona ni Pigon ang maong krimen.

Kini maoy hinungdan nga gitakda dayon sa korte ang pre-trial hearing sa maong kaso unya sa Enero 18.

Nunot niini ang kampo ni Pigon miawhag sa korte aron ikapahigayon ang speedy trial sa maong kaso aron mahatagan   dayon  og kasulbaran ug mapakanaog na ang desisyon.

Atol sa arraignment wala makatambong ang pamilya ni Pigon nga igo lang kining girepresentahan sa ilang abogado.

Si Pigon kasamtangan karong gibalhog sa Bagong Buhay Rehabilitation Center (BBRC) human gikustodiya og pipila ka bulan didto sa NBI-Manila.

Nasayran nga si Pigon didto kini motahan sa iyang kaugalingon sa NBI-Manila pipila ka bulan human sa krimen niadtong Mayo 2 sa milabay’ng tuig tungod sa kahadlok niini sa iyang seguridad gumikan sa kalambigitan sa maong krimen.

Si Pigon maoy gitumbok nga triggerman sa pagpusil patay ni Ilustrisimo sa Capitol compound gawas nga bahin sa Comelec provincial office niadtong nag-inangat ang eleksiyon sa Mayo 14.