Negosyante gitulis sa armado og armalite

Usa ka negosyante og hayopan ang gitulis   sa upat  ka wala mailhing tawo nga pulos nagmaskara ug armado M16 armalite rifle sa miaging gabii diha sa Bunlan lungsod sa Santander.

Ang mga tulisan nilampos pagsakiyo sa kuwarta ingon man ang mga mahalong alahas ug importanteng butang.

Segun sa report nga gipadangat sa Cebu Provincial Police Office ang gitulis nga negosyante giila nga mao si  Rito Miparanum.

Apan usa sa tulo ka nitulis nailhan nga mao si Marcos Pasculado alias Jun Garcia kinsa lumad sa Negros Occidental tungod sa pangag nga ngipon niini sa atubangan.

Nagtuo ang kapolisan si Pasculado maoy naggiya sa laing duha niya ka kauban nga giingong pulos  Tagalog ang sinultian niini.

Base sa pasiunang imbestigasyon sa kapolisan ang biktima nigawas sa ilang balay kay nituman sa sugo sa lawas.

Apan kalit lang nitunga sa atubangan sa biktima ang tulo ka armadong tawo dayong tion ug nideklarar hold-up.

Dihadiha gimanduan sa mga tulisan si Miparanum nga mobalik sa ilang balay,  usa sa mga   tulisan nagpabuto sa armalite tumong sa ibabaw.

Pag-abot sa balay gipangtionan usab ang pamilya sa biktima nga sila si Loreto, Rosemarie ug Maximiana ug gipanguha ang ilang alahas ug kuwarta.

Nakuha sa mga tulisan ang Singaporean gold nga singsing  P3,000, relo balor P3,500, duha bulawang neckless nagkantidad og 20,000 ug  15,000,  itom nga jacket P200, ingon man yawe sa multicab diin ang tanan mokabat sa P42,000.

Human sa maong pagpanulis ang tulo ka tulisan misibat paingon sa bukirang bahin sa nahisgutang lugar.

Matud pa ni SPO1 Manuel  Regulacion nga nahinabi sa Banat News  nga si Pasculado nakaila sa biktima tungod kay kaniadto nakapuyo sa ilang lugar sanglit duna kiniy gikapuyo nga babaye nga ilang silingan ug nisibat lang sa ilang dapit human makapatay kang Buenaventura Condisyon niadtong 1993. Apan dunay report nga nadawat ang kapolisan nagdala og kaugalingon pumpboat ug maoy ilang gisakyan agi sa Sibulan Negros Oriental sa ilang pagsibat human sa pagpanulis.