Usa ka electrician natagak sa poste

Kritikal ang kahimtang sa usa ka electrician human kini matagak gikan sa poste dihang nakuryentehan sa Barangay Cambaro, dakbayan sa Mandaue.

Ang biktima mao si Allan Salanio, 32, ulitawo,  nagpuyo sa maong dapit ug usa ka electrician sa Barangay Hall sa Cambaro.

Base sa imbistigasyon ni PO2 Dante Wenceslao sa station 5 sa Mandaue City Police Office (MCPO) nasayran nga samtang nagtaod si Salanio og kable sa kuryente gikan sa usa ka panimalay sa iyang silingan ngadto na sa usa ka poste sa Visayan Electic Company (VECO) iyang nasaghiran ang high tension wire nga adunay taas nga boltahe. 

Gumikan niini nahulog sa poste si Salanio ug gidali kini pagdala sa tambalanan sa Mandaue City Hospital ug gibalhin sa VSMMC ug anaa kini sa grabe nga kahimtang.

Matod pa ni PO2 Wenceslao gibanabana nga anaa sa 25 ngadto sa 30 ka tiil ang gitas-on sa nahulogan ni Salanio ug ang pagkabusdak niini sa yuta maoy usa sa hinungdan sa kagrabe sa kahimtang sa biktima nga anaa pa sa tambalanan.