‘Gipatay’ sa asawa

Usa ka amahan ang namatay human giingong natagakan sa flourescent lamp sa dihang iya untang puspusan ang iyang kinse anyos nga anak lalaki atol nga niulbo ang panaglalis tali sa iyang asawa niadtong Domingo sa gabii diha sa ilang pinuy-anan sa Tungcop, Minglanilla.

Apan ang inahan sa namatay dili motuo sa giingong hinungdan sa kamatayon sa iyang anak tungod kay sa awtopsiyang gihimo duna kini samad dinunggaban sa lusong-lusong.

Segun sa report nga nidangat sa Provincial Police giila ang biktima nga si Erwin Oberes, 38, ug residente sa maong dapit daling gidala sa iyang asawa ug anak sa Minglanilla District Hospital apan gideklara kini sa mga doktor nga dead on arrival (DOA)

Ang asawa sa biktima nga si Juliet nialigar ngadto sa kapolisan nga niadtong Domingo nag-away silang managtiayon ug diha usab ang ilang anak  lalaki nga nagpangidaron  og 15.

Matud pa ni Juliet nga nakainom ang iyang bana niadtong tungora atol nga sila naglalis apan kalit kining nikuha og gahi nga butang ug buot untang pusposan ang ilang anak apan nasangit sa flourescent hinungdan nga natagakan kini sa buak nga suga.

Segun sa asoy sa asawa nga nasamad ang tuong abaga ug liog niini hinungdan nga niagas ang grabeng dugo ug ilang gidali og hatud sa nahisgutang tambalanan.

Si SPO3 Remegio Elacion sa Minglanilla Police Station mitug-an nga ang patay’ng lawas sa biktima gihatud dayon sa punerarya dayon na ngadto sa ilang panimalay.

Apan niadtong Miyerkules ang inahan sa biktima mituyo og adto sa police station aron magpatabang kanila nga ipa-awtopsiya ang iyang anak (biktima) tungod sa pagduda sa gikamatyan niini.

Nunot niini matud pang SPO3 Elacion nga ilang giadto ang balay sa asawa ug ilang gihangyo nga ipa-autopsy ang lawas niini.

Dili gyud unta mosugot si Juliet nga ipa awtopsiya tungod kay ila na kining gibilaran ug duna usab siyay katungod nga mopugong isip asawa apan matud ni SPO3 Elacion nga mas labaw nga dunay katungod ang inahan maong misanong nalang kini.

Base sa autopsy report dunay samad dinunggaban sa walang lusong-lusong ang biktima nga maoy iyang gikamatyan dili kadtong samad sa tuong abaga ug liog nga natagakan sa flourescent.

Nunot niini ang asawa ug anak gitanggong sa Minglanilla police bisan sa panghimakak ni Juliet.

Sumala pa ni Elacion ilang gisusi ang balay ug ilang nasuta nga limpyo ug walay dugo ang ilang nakita.

Nasayran usab sa kapolisan nga  ang biktima kanunay mahubog unya inig uli pirmeng magmaoy ug walay laing kontra mao ra  ang iyang asawa ug anak.