Patay’ng lawas napalgan sa dagat

Patay’ng lawas sa 50 anyos nga babaye napalgang naglutaw sa kadagatan sa Talaga, Argao kinsa gituohang naghikog pinaagi sa pag-ambak sa dagat.

Ang namatay giila nga mao si Alicia Caballes, minyo nga lumad nga taga barangay Obong,  Dalaguete.

Si SP01 Esteban Albuera ug mga kauban nga maoy nakatubag sa alarma miingon nga ang anak maoy nag-ila sa maong patay’ng lawas ni Caballes.

Sa imbestigasyon nila ni SP01 Albuera  nahibaw-an nga nakasinati og nervous breakdown si Caballes ug pipila na ka adlaw ang nakalabay kini nga milakaw sa ilang panimalay.

Dugang pa niya nga misulay na sa paghikog si Caballes pinaagi sa pagdunggab sa kaugalingon apan dali nga natabang sa mga kabanay.

Milakaw si Caballes  sa ilang panimalay nga wala makamatikod ang mga kabanay ug gituhoang miambak sa dagat ug nalumos.

Gianod kini sa kadagatan sa Obong, Argao tungod sa kusog nga hangin nga habagat nga dala sa bagyo ug napalgan kini sa mga lumolupyo.