Minor de edad ang nangluba sulod sa diskohan

Usa ka minor de edad nakadunggab sulod sa diskohan nga nahitabo sa sitio Tungo, Basdiot,   Moalboal sa miaging adlaw.

Ang biktima giila sa kapolisan nga si Warren John Gorero, 18, ug nagpuyo sa  Sitio Cogon,   Basdiot samtang ang suspetsado sa pagpanunggab giila nga si Jun (apelyido gipugngan)  minor de edad ug nagpuyo sa Sitio Kalingking, Saavedra,    Moalboal.

Sa inisyal nga imbestigasyon nga gihimo sa kapolisan sa Moalboal sa dihang nagpahigayon ug usa ka disko ang maong barangay ang biktima nga si Gorero mikulata sa igsuon  ni Jun.

Sa dihang miduol  si Jun  ngadto sa biktima aron sa pag-uwang sa away tali sa iyang igsuon ug sa biktima gideretso kini siya og sukmag sa biktima ug maoy hinungdan nga misukol si Junbert.

Matud pa sa kapolisan  nga sa dihang nagkarambola na ang duha nakahigayon ang suspetsado sa pagkuha og kutsilyo diin didto niya kuha-a sa usa ka tindahan duol sa diskohan.

Ang biktima nga si Gorero nakaangkon og samad dinunggaban sa iyang luyong bahin sa lawas ug gidali kini sa pagdala sa Badian District Hospital aron matambalan ang samad nga naangkon niini.

Sila si  Insp. Gil Limosnero, PO3 Favio Fernandez ug PO2 Teodulo Baya Jr mao na ang misikop   sa dihang miresponde kini sila sa maong alarma.