Asawa gitadtad sa bana

Gitadtad og lampas hangtod namatay ang usa ka ginang sa iyang kaugalingong bana nga giingong nagselos kaniya diha mismo sa sulod sa ilang balay sa barangay San Vicente, Liloan niadtong Huwebes sa gabii.

Ang namatay ug nabulit og samad tinigbasan sa kalawasan giilang si Barbara Abarquez, 40, dihang naabtan sa mga polis diha sa ilang balay diin ang iyang tiil diha sa may pultahan sa ilang lawak.

Ang bana sa biktima human sa brutal nga pagpatay sa iyang asawa dali usab nga miadto sa balay sa iyang higala nga si Patricio Longakit diha sa sitio Lourdes sa samang barangay.

Sumala pang PO3 Marcelino Servilla, imbestigador sa Liloan police station, Banat News nga sayo pa nianang gabii ang 17 anyos nga anak nga babaye sa magtiayon nananghid sa biktima nga mosuroy una human sila makapanagkot sa kapilya sa San Vicente sanglit pista man niadtong adlawa sa ilang lugar.

Matud pa nga ang biktima mimando pa sa anak nga ipasusi una ang suspek diha sa balay sa silingan ug ang anak mitug-an sa inahan nga nag-inom kini uban sa mga silingan ug ang inahan mitugon sa bata nga paulion human sa usa ka oras gikan managkot.

Apan sa pagbalik sa bata patay na ang iyang inahan. Nasuta nga dihang wala siya sa balay nag-away ang iyang mga ginikanan diin ang biktima gikatahong gibansagan sa suspek og "boring."

Ang panag-away miresulta sa pagpanigbas diin wala na mahitsura ang bukton sa babaye gumikan sa pagpanagang, nabulit usab siyag tinigbasan sa dughan, dinunggaban sa likod, paa, ug ulo.

Sumala pang Marcelino nakadawat sila og tawag gikan kang Longakit kabahin sa krimen diin ang suspek gusto nang mosurender maong gidali nila og adto ang panimalay sa magtiayon ug gidala sa Eversly Child Hospital sa Mandaue ang biktima apan gideklarar kining dead on arrival.

Ang suspek gikatakdang pasakaan og kasong parricide sa kapolisan diha sa piskalya.