Comelec registrar sa Lapu-Lapu hulipan

Si Lapu-Lapu City Comelec Registrar Janeth Lamban hayan mahulipan sa katungdanan sa dili pa ang eleksiyon sa Mayo 14.

Nunot kini sa gipadalang reklamo ni acting Mayor Norma Patalinghug ngadto sa ulohang buhatan sa Comelec-Manila nga nag-awhag sa paghulip niini sa katungdanan.

Si Patalinghug miingon nga gitinguha niya ang limpyo ug matinud-anong eleksiyon sa dakbayan nga iyang gikabalak-an nga mapakyas kun dili kabutangan og bag-ong Comelec registrar ang dakbayan.

Ang hepe sa kapolisan nga si Supt. Louie Oppus gikataho usab pagahulipan sa katungdanan sa pag-asumer ni Patalinghug.

Si Patalinghug mipasabot nga iyang gireklamo kang Sr. Supt. Silverio Alarcio si Oppus tungod sa kapakyas sa pagsanong sa pagpangayo niya og assistance.

Matud pa ni Patalinghug nga nangayo siyag polis nga mobantay sa city hall alang sa pagseguro nga kabantayan ang mga dokumento human sa pagka suspenso ni Mayor Arturo Radaza.

Si Patalinghug miingon nga gipasapasa siya sa mga polis sa Lapu-Lapu ug wala usab niya makontak si Oppus bisan sa iyang mga pagtawag nga gihimo.