Kawani sa danao CH gipatay

Patay ang usa ka empleyado sa Danao City Hall dihang gipusil sa iyang kaubang empleyado human sa mainiton nilang panaglalis nga miresulta sa pagpamusil sa miaging gabii duol sa Danao City Hall nga nahimutang sa Poblacion sa maong siyudad.

Segun sa report nga nadangat sa Provincial Police giila ang biktima nga si Danilo Avila, 40, minyo tigbantay sa City Hall ug residente sa Guinacot, Danao.

Samtang ang gitumbok nga suspetsado nga mipusil sa biktima naila nga si Benito Lavador, driver sa city hall ug nagpuyo sa Sitio Taboc, sa sama nga barangay sa maong siyudad.

Si SPO3 Edgar Gomez nga nahinabi sa Banat News niingon nga ang iyang kauban nga si SPO3 Ramerito Ramonida maoy nagpahibaw human makadungog og buto sa armas sa dihang naagi sa nahitaboan.

Matud ni SPO3 Gomez bisan si Ramonida off duty niadtong higayona apan niuban kini ni SPO2 Ramir Oliverio pagsusi sa naasoy'ng lugar.

Sa pasiunang imbestigasyon nga hinimo ni Oliverio nagbutyag pasado alas 7:10 sa gabii niadtong Biyernes si Avila uban sa iyang kauban nga si Nicanor Flores nag duty niadtong tungora isip tigbantay sa building sa City Hall.

Lakip sa gibantayan sa duha mao ang mga opisina ug apil ang merkado publiko.

Dihang nagkita ang biktima ug ang suspetsado diha atubangan sa buhatan sa Traffic Enforcers nitumaw ang panaglalis sa wala matinong hinungdan tali nilang duha apan ang mga sakop sa Special Operations Group (SOG) maoy nipatunga sa biktima ug gikatahapan ug gihilot ang ilang panagbangi.

Pagka alas 7:30 ang biktima ug si Flores naglakaw padung na mamauli sa ilang pinuy-anan apan pag-abot diha sa atubangan sa Bureau of Internal Revenue kilid sa City Hall ang gikatahapan niabot nga nagmaneho sa iyang multicab.

Kalit lang mibunot sa wala matinong kalibre sa armas ang gikatahapan ug gipusil ang biktima diha sa dughan ug buko-buko.

Daling gihatod sa Danao District Hospital ug gibalhin lang usab dayon sa Perpetual Soccuor Hospital pero patay na kini sa pag-abot sa nahisgutang tambalanan.

Narekober sa kapolisan ang multicab GDT 121 nga gisakyan sa gikatahapan sa pagkahitabo ug giabandonar diha sa kakahuyan sa Sitio Cuacohan, Dungo-an Danao nga gibana-banang unom ka kilometro ang gilay-on gikan sa Poblacion.

Si SPO3 Gomez nagkanayon nga ang ig-agaw sa suspetsado nisulti kanila nga mosurender apan sa pagsulat ning balita wala gyud pakita sa kapolisan ang gikatahapan.

Sa pagka karon padayon ang gihimong hot pursuit operation batok ni Lavador human milayas ug nagtago-tago.