Pasangil ni Nerissa vs Quisumbing dili tinuod — Bert Emphasis

Dili tinuod ang pasangil ni Kongresista Nerissa Soon-Ruiz nga gipwersa siya sa banay'ng Quisumbing aron modagan sa pagka-mayor sa dakbayan sa Mandaue samtang si Bokal Luigi Quisumbing sa pagka-kongresista.

Kini ang gibutyag ni Transportation and Communication Undersecretary Elberto Emphasis kinsa kauban nilang Norberto Quisumbing ug Ruiz sa usa ka sabotsabot niadtong Pebrero 11.

Si Emphasis kinsa mao usab ang tigpamaba sa partido Lakas sa Kabisay-an miingon nga si Ruiz interesado nga modagan sa pagka-mayor sa dakbayan sa Mandaue.

"Ang inyo gastuhon kang Jonas Cortes mas dako kay ang ako P30-milyones ra," ang pamahayag ni Ruiz ngadto kang Quisumbing nga gisubli ni Emphasis.

Si Emphasis ningbutyag sa ilang mga gisabutan isip panimawos sa pasangil ni Ruiz nga gikasab-an siya ni First Gentleman Jose Miguel Arroyo labot sa kahimtang sa partido Lakas sa Sugbu.

Giangkon ni Emphasis nga gitawgan siya ni Arroyo apan dili bahin sa Lakas ang ilang giestoryahan ug wala usab siya kasab-i.

Matud pa ni Emphasis nga dili lang sa maong kaso namakak si Ruiz kon dili daghan pang pagpamakak nga nahimo sa kongresista.

Usa niini ang pangangkon ni Ruiz nga wala silay utang kabubut-on sa banay'ng Quisumbing nga matud pa ni Emphasis nga sa dihang napili si Ruiz sa pagka-kongresista sa tuig 2001, ang banay'ng Quisumbing ang nagpapuyo kaniya og condominium ug gipagamit og sakyanan sa Manila.

Matud pa ni Emphasis nga sa dihang gipahibawo ni Quisumbing si Ruiz nga modagan ang apo nga si Luigi, nagtoo sila nga mohangyo nga dili lang una apan nipasumbingay hinoon nga pwede ra usab siya mag-mayor ug si Cortes ang iya himuong bise-mayor.

Wala pa hinuon gibutyag ni Emphasis ang hinungdan kon nganong nibuwag si Ruiz sa mga Quisumbing ug nitapon sa mga Ouano apan andam siya mobutyag kon mohagit si Ruiz.

"Ako siya respetohan bisan ingon ana na," sumala pa ni Emphasis