Polis nangilkil negosyante gi-entrap

Polis nga nangilkil sa usa ka negosyante nadakpan sa gihimong entrapment operation sa Provincial Investigation and Intelligence Branch (PIIB) inabagan ni Insp. Gil Limosnero kagahapon sa hapon sa usa ka money changer atbang sa Police Station sa Moalboal.

Nangulo sa entrapment operation mao si Supt. Juanito Enguerra hepe sa PIIB.

Si Limosnero nga nahinabi sa Banat News miila sa nangilkil nga polis mao si PO1 Jerome Geromo, 39, minyo, lumad nga taga Guadalupe dakbayan sa Sugbo kinsa unom na katuig nga nadestino sa Moalboal Police.

Usa ka Rafael Niño Ybañez, hingkod, residente sa Panagsama giingong usa ka mahuyang nagnegusyo ug imnanan sa nahisgutang dapit ug dunay kapuyo nga foreigner kinsa midangop ni Limosnero ug misumbong kabahin sa pagpangilkil kaniya sa maong polis.

Si Rafael gikatakdang molarga karong umaabot Domingo sa Singapore aron moapas sa iyang kapuyo nga langyaw apan nahasol sa maong sitwasyon.

"Gisigehan na siya og extort og kuwarta last year pa usahay moadto ang (suspek) sa reklamante manghagis pa nga mangayog kuwarta unya atong usang adlaw gipangayuan na pod siya wala na siguro kaagwanta ang biktima mao tong nianhi siya nako gahapon (Miyerkules) sa opisina ug nisumbong" asoy ni Insp. Limosnero.

Matud niya nga aron mapamatud-an ang gisumbong ni Ybañez iyang gitanyagan nga ipa entrap ang maong polis.

Dugang pang Limosnero iyang gikonsulta ngadto ni Moalboal mayor Inocentes Cabaron ang iyang sugyot nga himuon ang entrapment operation.

Ang kuwarta nga nagkantidad og P2,000 ang gigamit sa paglaang kang Geromo.

Human madawat ni Geromo ang kuwarta gikan ni Ybañez gidakop gilayon nila ni Enguerra ug mga kauban ug gikuha ang service firearm niini.

Gihulagway ni Limosnero si PO1 Geromo nga usa ka abusado ug badlungon nga polis sanglit nanghagis na kini tungod sa kahubog sulod sa police station.

Niadtong miaging adlaw gisumbag ni PO1 Geromo ang suloguon ni Limosnero nga kinse anyos kay wala tarungag limpyo ang motor niini.

Kasong Child Abuse ang giandam na karun ni Limosnero batok sa maong polis gawas sa kasong robbery extortion ang gipaabot nga ikapasaka.