Ginang gisaka sa balay, gipatay

Patay ang usa ka ginang sa panimalay human kini mabiktima sa pagpanigbas sa miaging hapon sulod sa ilang panimalay sa sitio Lasang, Mactan, Lapulapu.

Ang biktima mao si Felicidad Leonardo, 48, minyo ug ang nagtigbas mao si Vicente Abing, hingkod ang panuigon ug managsilingan sa maong dapit.

Sa imbestigasyon nila ni SP02 Rolito Jumao-as sa homicide section sa kapolisan sa maong dakbayan, nasayran nga nagluto sa kusina ilang panimalay ang biktima.

Gisaka kini sa suspetsado nga nagdala og mahait nga sundang ug gipanigbas kini hinungdan nga nakabaton og mga samad tinigbasan sa buko-buko, abaga, ulo ug uban pang bahin sa kalawasan.

Matud pa ni Jumao-as nga ang mga silingan sa biktima maoy dali nga midala sa biktima sa Mactan Doctor's Hospital sa Basak, Lapulapu apan gideklarar sa mga doktor nga patay na kining nahidangat kanila.

Si SP02 Jumao-as miingon nga nagbaton og kasuko ang suspetsado sa biktima sanglit gikaaway kini sa miaging adlaw.

Namatikdan sa suspetsado nga nag-inusara kini sa kusina sa ilang panimalay nga maoy hinungdan nga gisaka nga nagdala og sundang ug gipanigbas sa makadaghang higayon.

Ang suspetsado kinsa dali nga nakasibat pahilayo sa maong dapit padayon karong gipangita sa kapolisan.