Sikyu ang 'kontak'

Ang gitumbok karon nga posibleng 'insider' sa nahitabong pagtulis sa Dranix Distributors Inc. mao ang gipatay nga gwardiyang unang mipasulod sa lima ka lalaking nag-uniporme og polis niadtong milabay'ng kaadlawon diin nasakiyo ang gibana-banang usa ka milyon nga cash.

Si Sr.Inspector Alexis Relado, hepe sa Theft and Robbery Section ug maoy lider karon sa task force nga nangulo sa imbestigasyon mitumbok kang Edgardo Emboledo,Sr. nga maoy kontak sa mga suspek.

"Iyung napatay na gwardiya (Emboledo) ay yun ang mole nila talaga sa loob," asoy pang Relado.

Matud pang Relado sa mga tigbalita nga base sa nakit-ang reenactment sa insidente nga gihimo sa kaubang gwardiya ni Emboledo nga si Edgardo Tabigui niadtong milabay'ng hapon dako gyud ang posibilidad nga may kalambigitan ang maong gwardiya.

Si Tabigui sa reenactment nagkanayon nga ang kolor grey nga Toyota Light Ace van nga gisakyan sa mga suspek diha na magbabag sa sulod sa compound, ug si Tabigui pa usab ang mipatingog sa pito aron siya paduolon.

Ang maong mga polis gikatahong nagpailang mga sakop sa Sosia ug buot nga moinspeksyon sa ila.

Apan nasuta nga human na gipusil si Emboledo nadala na sa mga suspek ang pungpong sa yawe ug kahibalo na nga asang partikular nga yawe ang gamiton pag-abli sa administration office diin gibutang ang metal vault.

Samtang nahibulong usab ang Task Force nganong ang mga suspek mipatay kang Emboledo nga wala naman kini misukol.

Lima ka makapaduda sa mga polis mao; nasayod gyud ang mga suspek nga dunay kwarta sa maong buhatan nianang orasa; walay timailhang gipugos ang pagsulod sa gate ug opisina; ang yawe sa gwardiyang si Emboledo natultulan dayon;ug labaw sa tanan diha na sa sulod ang van dihang miabot si Tabigui.

"Honest opinion ko, si Emboledo ang involved doon, kaso lang dinobol-cross siya para ma-stop nalang dun yung chain of events kaya dun na rin siya pinatahimik," asoy pang Relado.

Nasuta usab sa task force nga niadtong Nobiyembre palang mi-aplay na si Emboledo nga mabutang sa night shift hangtud sa bulan sa Enero, nagtuo si Relado nga posibleng mao ning mga buwana nga giplano ang pagtulis sa maong establisamento.

Apan ang inahan sa biktima nga si Francisca kinsa gihinabi sa Banat News niadtong milabay'ng adlaw nagkanayon nga buotan ang iyang anak ug naninguha sa iyang kaugalingong paningkamot.

Dunay upat ka anak si Emboledo ug kasamtangang nag-upgrading sa iyang nahumang kursong Bachelor of Science in Marine Transportation, gani maong mihangyo kining mo-duty og panggabii tungod sa iyang klase.

Gisubay usab karon sa task force ang impormasyong dunay mga kawaning wala makuntento sa pagpadagan sa maong kumpanya sumala pa sa opisyal.

Si Tabigui kinsa gipailawom sa lie detector test National Bureau of Investigation giingong mipasar sa maong eksaminasyon apan gipaabot pa hinuon ang opisyal nga resulta lakip na ang resulta sa paraffin test.

Matud pang Relado nga si Tabigui mikooperar og maayo sa kapolisan sa imbestigasyon.

Gitug-an usab ni Relado nga duna na silay gipanid-ang grupong posibleng maoy mitulis sa Dranix. Diha sa crime scene nahibilin usab ang usa ka backpack nga may tag sa Philippine Ports Authority nga nagpakitang miagi sa pantalan sa Surigao ang maong bag.