Mga sikyu gamiton sa Summit

Dili lang mga polis ug militar ang gamiton alang sa pagpahigayon sa luwas nga pagpahigayon sa Asean Summit karong Enero 12 ngadto na sa 15 sanglit bisan mga gwardiya sa mga establisamento gihatagan usab og papel.

Si Police Regional Office 7 director, Chief Supt. Silverio Alarcio Jr. sa pakighinabi sa mga tigbalita kagahapon mitug-an nga tanang mga gwardiya sa nagkadaiyang security agency nga dunay mga sakop nga gidestino diha sa ceremonial routes lakip sa gipapaniid.

Kining maong mga gwardiya nadestino sa nagkadaiyang mga tindahan, buhatan ug uban pa nga diha mahimutang sa agianan sa ceremonial routes.

Naglakip sa ceremonial routes mao ang mga dalan gikan sa Marco Polo Hotel, Mariott Hotel, Shangri-la Hotel and Resort sa dakbayan sa Lapulapu ngadto na sa Cebu International Convention Center sa dakbayan sa Mandaue.

Matud pang Alarcio dunay kapin sa 1,500 ka mga pribadong gwardiya nga nadestino diha sa maong mga dapit nga napanglantawang magamit sa pagpalig-on sa seguridad ug pagpaniid.

Ang mga gwardiya gipangtagaan na og police hotline numbers nga madali nila og tawag ngadto Asean Summit Security Task Force kun duna silay mamatikdang dili ordinaryong kalihukan sa ilang dapit atol unya sa pagpahigayon sa summit.

Wala hinuon klaroha kung dunay incentive ang mga gwardiya sa ilang dugang trabahuon atol sa summit.

Si Alarcio midugang nga karong Enero 9 alas 8 sa buntag ipahigayon ang ikaduhang dry-run sa ceremonial routes diin bansayon pag-usab ang mga police escorts ug driver sa mga heads of states sa pagmaneho gikan sa mga hotel pangadto na sa CICC.

Paninguhaon sa task force nga di maabtan og usa ka oras ang dry-run aron di mabalda ang dagan sa trapiko, mahimo usab nga paagian ang dalan kung walay moaging convoy.

Samtang si Alarcio nagkanayon nga bisan pa man gideklarar nag holiday ang Enero 12 ug Enero 15 gipaabot niyang daghan gihapong tawo ang magpunsisok sa kadalanan tungod sa umaabot nga Sinulog.