BOPK wa mahulga's Tribu Sugbu

Wala mahulga ang Bando Osmeña Pundok Kauswagan (BOPK) niining giumol nga bag-ong pundok sa oposisyon nga gitawag og Tribu Sugbu nga gipangulohan ni kanhi Cebu City Sports Commissioner Jonathan Guardo nga maoy moatbang sa umaabot eleksiyon karong bulan sa Mayo.

Atol sa press conference kagahapon sa udto gibutyag ni Mayor Tomas Osmeña nga wala siya mahulga sa maong pundok tungod kay gisalig niya sa mga Sugboanon ang paghukom kun angay pa ba siyang pilion og balik sa umaabot piniliay.

Subling gipasabot sa mayor nga dili kalikayan nga dunay mga tawo nga nasuko og naglagot kaniya tungod sa iyang mga giluwatang desisyon nga wala ibase sa popularidad kun dili gipasubay sa interes sa katawhan ug sa gobyerno.

Pagkakaron mas gihatagan og prayoridad sa mayor ang pagserbisyo inay panumbalingon ang kasikas sa politika nga gipasiugdahan karon sa oposisyon.

Si Guardo determinado nang magtukod og pundok nga Tribu Sugbu nga maoy mopaluyo sa mokandidato pagka mayor atbang sa BOPK karong piniliay sa bulan sa Mayo.

Samtang si Guardo determinado na usab kining moatbang kang Kongresista Antonio Cuenco sa habagatang bahin sa dakbayan sa Sugbo.

Hinuon mipadayag og gamay'ng kompiyansa si Osmeña ilabi na kay suportado ang iyang administrasyon sa mayoriya sa mga kapitan sa kabarangayan apan iya usab nga giangkon nga dili gihapon kini garantiya aron sigurado nga modaug siya sa umaabot piniliay.

Gibasehan ni Osmeña ang pagpildi kaniadto ni kanhi Mayor Alvin Garcia sa 2001 election diin si Garcia gipaluyohan sa subra sa 80 porsyento sa mga kapitan sa barangay apan midaog gihapon siya.