Unsaon pag-ila sa peke nga kwarta

Gihingusgan sa Bangko Sentral ng Pilipinas ang kampanya batok sa mga mini nga kwartang papel ug sensilyo nga posibleng isagol unya sa mga transaksyones atol ning kapaskuhan.

Tulo ka dagkong opisyal nga Bangko Sentral ng Pilipinas nga sila si Rogelio Garcia ang deputy director sa BSP, Roberto Sequia ug Maja Gratia Malic ang counterfeit examination group sa BSP pulos gikan sa Manila mitug-an nga angayang bantayan sa publiko ang pagkatap sa pekeng mga salapi.

Kini tungod kay di kini mabantayan kung di makahibalo ang makagunit niini kung unsaon pagsigurong di mini ang iyang nadawat.

Matud pa sa mga opisyal nga dunay mga nasakpang mga peke nga kwartang papel ug sinsilyong P5 ug P10 nga kung sa yanong pagtan-aw di mahalata nga mini kini.

Ang peke nga kwartang papel sinawon, hanap ang imprenta, walay watermarks, walay kolor pula ug blue nga fibers (mga pinong hilo), walay klarong mga window security threads (mga linya) ug di mag-usab ang kolor kung tan-awon gamit ang ultraviolet light counterfeit detector machine.

Samtang ang tinuod nga kwarta sukwahi ra sa gihisgutang depekto sa mga peke nga kwarta.

Mipasidaan usab ang taga BSP nga walay pulos ang mga ultraviolet light counterfeit machines kung di makamao ang mooperate niini pagtino kung unsay peke ug dili.

Ang peke usab nga P5 ug P10 matino nga sinsilyo mahibaw-an lang kung susihon pag-ayo ang pagkakulit sa mga hulagway niini, ang kilid sa peke nga sinsilyong P10 hait ug makita sa isig ka kilid ang "giring-giring" kun baglis-baglis, samtang ang P5 nga way "giring-giring" hait usab ang kilid.

Apan giklaro sa taga BSP nga wala pay peke nga mga sensilyong nikatap dinhi sa Sugbo sanglit nasikop dayon didto sa Manila ang mipasiugda niini.

Sumala pa sa BSP nga kung makahupot ang si bisan kinsa og peke nga kwarta mahimo nila kining dad-on sa BSP sa ilang mga lugar o ba kaha sa mga lokal nga bangko diin sila hatagan og resibo samtang ipadala kini ngadto sa Manila aron susihon.

Ilisan ra usab dayon ang maong kwarta inig gawas sa eksaminasyon.

Matud pang Garcia, nga ning panahon sa kapaskuhan sayon ra kaayo isagol sa mga iligalista ang mga peke nga salapi tungod sa kapaspas sa dagan sa mga transaksyones karon diha sa mga merkado.