Naghikog kay gikasab-an

Usa ka 20 anyos nga graduating nga tinun-an sa kolehiyo ang gikatahong naghikog ug napalgang patay nga nagbitay diha sulod sa ilang payag gawas sa ilang balay sa Naya Village sa Tisa ning dakbayan kagahapon sa kaadlawon.

Ang patayng tinun-an giilang si Gerlie Mae Almerol,20, tinun-an sa usa ka inilang kolehiyo nga iya sa gobiyerno ug nagkuha og kursong pagkamaestra sa maong tunghaan.

Ang uyoan sa biktima nga si Jaime Famador,56, maoy gikatahong unang nakakita sa biktima nga dunay hikot nga bakos diha sa liog ngadto na sa kahoy ibabaw sa payag nga gibutangan sa iyang bisekleta kagahapon sayo sa buntag diha sa nahisgutang dapit.

Matud pa sa imbestigasyon sa Homicide Section pinanguluhan ni SPO3 Rey Cuyos nga namatikdan ni Famador ang tiil sa biktima diha sa ibabaw og sa paghangad niini nakita niya ang kahimtang sa biktima ug daling gipahibalo ang amahan sa tinun-an nga si Paulo.

Nasuta nga nianang milabay'ng gabii pasado alas 10 na dihang ulahing nakit-ang buhi ang biktima. Kini samtang siya giingong gikasab-an sa amahan tungod kay dugay kining mipauli.

Walay nakitang foul play ang kapolisan diha sa crime scene gawas lang sa bakos nga panit nga nakit-ang gihikot sa liog ni Almerol.