P800 mil danyos sa sunog sa Lacion

Mokabat sa P800 mil ang danyos sa sunog nga nahitabo sa usa ka bodega sa mga karton didto sa Pulpogan, Consolacion sa milabay'ng hapon.

Base sa imbestigasyon ni Fire Sr. Insp. Melchor Labuca sa Consolacion Fire Station, nasuta nga didto nagsugod ang pag-ulbo sa kalayo sa bodega nga puno og mga karton sa katol nga gipanag-iya ni Raymund Go ug tag-iya usab sa maong edipisyo.

Lakip sa naapektuhan ang Dan's Penta Industries nga tiggama og mga karton.

Matud pa ni FO3 Noel Congson sa Consolacion Fire Station nga naglisod sila og sulod sa maong edipisyo gumikan sa kahuot sa maong agianan ug gumikan sa mga karton dali kaayo mikatap ang kalayo.

Hinuon walay gikatahong naangol sa maong insidente samtang padayon pa ang ilang imbestigasyon sa hinungdan sa maong sunog, samtang gibanabana kini nga moabot sa P800 mil ang danyos sa maong sunog.

Nadawat sa kabomberohan ang sunog mga 3:05 milabay'ng hapon diin gideklarar kini nga 3rd alarm ug nakontrolar kini sulod sa 30 minutos.