'Kawatan' sa hotel nadakpan

Usa ka gidudahang kawatan sulod sa mga mahalong fitness gym ang nadakpan sa akto nga nangabli og locker sa laing kustomer diha sa usa ka fitness gym sa usa ka inilang hotel sa barangay Lahug ning dakbayan kagahapon.

Ang gidakop giilang si Rey John Lopez kinsa nangalyas og Reynaldo Lucero Jr. sumala pa sa iyang mga ID nga gipakita sa matag gym nga iyang sudlan. Si Lopez nakuhaan og ID nga nagpailang usa siya ka instructor sa lenggwahe nga nagbase sa Mabolo ning dakbayan.

Ang Criminal Investigation and Detection Group 7 nakadawat og suwat-reklamo gikan sa buhatan sa maong hotel kabahin sa nagsunod-sunod nga insidente sa pagpangawat sugod niadtong Oktubre 19 hangtud Nobiyembre 11 ning tuiga sa locker room sa mga lalaki.

Matud pang Chief Inspector Rex Derilo nga duna nay unom ka mga mireklamong kustomer sa maong hotel kabahin sa pagkawala sa ilang mga butang nga ilang gisulod sa ilang mga locker.

Apan ang gikahibudngan sa ubang mga biktima, mao nga ang mga locker nakakandado ug walay laing makaabli niini kundili sila ra.

Dihang nasakpan sa akto, nakit-ang migamit siya og mga yawe sa pag-abli sa maong locker nga gipanag-iya sa usa ka Loyd Vincent dela Cruz diin gikuha niini ang pitaka sa naulahi ug gisulod sa iyang bag.

Apan sa dayon na niyang gawas sa lawak, gisugat siya sa mga gwardiya ug mga sakop sa CIDG7 hinungdan sa iyang pagkaaresto.

Usa sa mga mireklamo nga gikahinabi sa Banat News mao sila si Ellery Ariate, 25, kinsa nawad-an sa iyang mahalong cell phone ug pitakang may sulod nga P4 mil niadtong Nobiyembre.

Matud pa niya human siya mag-worked out nahibulong na siya sa dihang naabli na ang iyang locker ug wala na ang iyang mga butang. Si Lopez daan na niyang nakit-an diha sa maong locker room una pa siya magsugod sa pag-work out.

Samtang laing biktima mao si Rajid Enad, 21, kinsa nawad-an gihapon og N73 cellular phone ug bulawang kwintas.

Atol sa pagkadakop kang Lopez nakuhaan kini og bag nga itom nga may sulod nga duha ka pitaka, bracelet, duha ka ID niini, usa ka bakos, usa ka MP3, tulo ka relos de pulso, tulo ka cellular phone ug mga resibo sa mga gipangprendang mga cellular phone ug alahas, cash nga P2,267.25; usa ka dolyar; silver nga singsing; pungpong sa mga yawe ug mga simpacks.