Delegado sa ASEAN di "excuse" sa bird flu test- BoQ-7

Gipaalerto karon pang daan sa Bureau of Quarantine (BoQ) ang tanang tugpahanan sa nasud pagsiguro nga way mga delegado sa ASEAN Summit nga makaentra nganhi sa nasud nga magdalag "bird flu" (BF) virus.

Matud pa ni Dr. Pablo Balite, Regional Director sa BoQ-7 nga matag tugpahanan, gibantayan pag-ayo aron ang tanang tiil sa mga pasahero gikan sa gawas makatunob gyud sa "foot bath" nga giinstalar sa BoQ.

Miingon si Balite nga ang tuyo niini mao ang pagpatay sa kagaw nga naa sa sapatos o bisan sa lawas sa matag tawo ilabi na niadtong mga delegado sa ASEAN Summit.

Nasayran nga ang BF nagpabiling hulga sa kinabuhi sa mga molupyo sa nagkalainlaing nasud sa Asia ug mga sakop sa Association of Southeast Asian Nations (ASEAN) sama sa Indonesia, China, Thailand ug uban pa.

Busa lakip nga gibantayan sa BoQ, mao ang mga kargamento sa maong mga delegado sama sa mga langgam, manok ug uban pang kasagaran maoy magdala sa sakit nga BF.

Ning nagsingabot nga ASEAN Summit, ang tanang mga opisyal sa Veterinary Quarantine office sa nagkalainlaing probinsiya dinhi sa Central Visayas sama sa Bohol, Negros Oriental, Siquijor ug Cebu, mabinantayon na kaayo sa ilang pagmonitor sa tanang aspeto kalabot sa BF.

Kini sa pagsiguro nga walay dautang mahitabo sa nasud atol ug sa inigkahuman na sa ASEAN Summit.

Miingon si Balite nga ang virus sa BF tua magsukad sa mga nasud sa gawas, busa kon may makaentra mang karne dinhi sa Pilipinas nga gikan sa mga kanasuran nga positibo sa BF, gibantayan pag-ayo nga dili makaon sa mga tawo, busa dauban dayon nila kini.

Kasagaran sa magpalusot niini mao ang mga "smuggler" nga mga negosyante nga way paglantaw sa dakong risgong idulot niini sa Pilipinas.

Midugang si Balite nga matag hotel dinhi sa Cebu may sertipikasyon sa ilang buhatan sa BoQ nga luwas sa BF ang ilang mga karne nga isilbi sa mga delegado sa ASEAN Summit.