Tresurero nagbantay sa disko gipusil sa wa pasudla

Tresurero sa barangay nalandig sa tambalanan human kini gipusil sa duha ka suspetsado sa dihang wala kini niya pasudla sa usa ka diskohan diin ang biktima maoy nagbantay.

Ang biktima nga si Andriano Obatay, 50, ug nagpuyo sa Balinog, Naga, nakaangkon og samad pinusilan sa iyang tuong paa .

Sa pasiunang imbestigasyon nga gihimo sa kapolisan sa Naga, ilang nasuta nga naglagot ang duha ka suspetsado nga naila lang sa ngalang Noel ug Joel, nga nagpuyo sa Lagtang, Naga sa maong biktima tungod kay wala sila pasudla niini sa diskohan ug gipangayoan sila sa biktima ug P270 entrance fee aron makasulod sa maong diskohan.

Matud pa nga nasuko ang duha tungod kay niadtong higayona may lain silang kuyog nga lima kabuok ug nauwaw sila sa gibuhat ni Obatay.

Sa dihang ang biktima migawas sa maong diskohan wala niini mabantayi nga gisundan na diay siya sa mga suspetsado ug dayon pusil kaniya sa wala pa matino nga kalibre.

Gidala kini sa mga residente sa tambalanan sa Vicente Sotto Memorial Medical Center.