6 ka trak de kargang kahoy'ng Gemelina, Mahogany 'sakmit

Unom ka mga trak de kargang puno og tablon sa mga kahoy nga Gemelina ug Mahogany ang gisakmit sa mga sakop sa Talamban police station kagahapon sa kaadlawon human magduda ang mga polis sa mga dokumentos nga gidala sa mga drayber niini.

Ang maong mga kahoy gikatahong napalit sa usa ka negosyante og kahoy diha sa Humay-humay sa dakbayan sa Lapulapu nga giilang si Orlando Villa.

Ang maong mga trak gikatahong gikan sa barangay Cambinucot ning dakbayan ug dad-on na unta sa dakbayan sa Lapu-Lapu apan sa pag-agi diha sa atubangan sa Talamban police station gibabagan kini sa grupo nila ni PO1 Allan Macatangay.

Sumala pa sa Talamban police station nga nakadawat sila og tawag gikan sa usa ka concerned citizen kabahin sa unom ka trak nga puno og kahoy gikan sa bukid ug padulong na diha sa Talamban.

Ang grupo ni Macatangay daling mibutang og road-block hinungdan sa pagkasikop sa maong mga trak nga may mga plakang YDG-685;GSN-545;YBU-792; GEH-298; GTE-996; GNG-958.

Ang tag-iya niini mipresentar og papeles gikan sa Department of Environment and Natural Resources -7 apan ang mga polis nagkanayon nga walay gipakitang business permit ang tag-iya, wala ideklarar kung pila ang balor sa maong mga tablon ug ingon man ang gihulagway nga "understated" nga permit to transport.

Dugang pa niana sumala pa sa mga polis nga tulo lang sa mga trak ang mitukma sa nabutang sa permit ug ang tulo wala diha.

Tungod niini gipugngan sa mga polis nga makapadayon sa ilang biyahe ang maong mga trak samtang gisusi pa ang mga papeles niini.