Tramcar para mga utanon sa Dalaguete tukoron

Ang pagdagan og "tramcar" usa ka sakyanan nga susama sa "cable car" sa lungsod sa Dalaguete, alang sa mga produktong utanon maghatag og dugang umento sa mga mag-uuma nga makasanta sa mga hunahunang rebelyoso o subersibo, matud pa ni Municipal Planning and Development Officer Marife Sambrano.

Hinoon ang lungsod sa Dalaguete, sumala ni Sambrano malinawon kaayo sukad pa kaniadto tungod kay bise kaayo ang mga mag-uuma sa pag-atiman sa ilang mga produktong utanon.

Tungod kay mao kini ang gitawag nga "vegetable basket" ning lalawigan, gihimoan og paagi sa Department of Agriculture (DA) nga imontar ang usa ka modernong sakyanan nga ekslusibo lang sa mga utanon.

Upat ka mga barangay sa bukid ang montaran niini nga maglakip sa barangay Langkas, Lubo, Caliongan ug Mantalongon, matud pa ni Sambrano.

Miingon siya nga namugna kining maong laraw dihang namatngonan nila nga kasagaran sa mga utanong presko ug lab-as kaayo gikan sa kaumahan, inig-abot sa merkado sa dakbayan sa Sugbo, lawos ug bun-og na kaayo.

Kini tungod kay kasagarang sakyanan sa bukid mao ra ang habal-habal ug ang dalan gubaon kaayo.

Matud pa ni Sambrano nga kon mahuman na kining tramcar nga gisugdan na sa pagmontar dili pa dugay, mas dali nalang kaayo, ug dili na usab bun-og ang mga utanon nga moabot sa Carbon market sa Cebu City.

Ang maong tramcar gitawag og "two way" kon makabalik-balik ra ang maong sakyanan gikan sa usa ka barangay paingon sa barangay Mantalongon nga maoy himoong sentro diin anha pundoka ang tanang produksyon sa bukid aron hakuton na usab og trak paingon sa merkado sa dakbayan sa Cebu.

Tungod niini, umentado ang pagpuyo ug panginabuhi sa mga taga bukid busa matud pa ni Sambrano nga way luna ang mga rebeldeng NPA didto sa ilang bukid.