Pusher sa A-Lopez napusilan

Napusilan ang usa ka gidudahang drug pusher diha sa dalan A.Lopez, Calamba ning dakbayan human kini gikatahong misukol ug misuway og ilog sa armas sa usa ka polis nga midakop kaniya niadtong Lunes sa udto.

Ang napusilan giilang si Joel Apura,48, taga dalan F.Ramos, Cogon ning dakbayan kinsa gidakop sa grupo nila ni SPO1 Mitodio Aparis ug PO3 Fortunato Macaranas sa San Nicolas Police station.

Gikatahong kasamtangang nagpatrolya ang miscellaneous team sa maong police station diha sa maong lugar dihang nasigpatan si Apura nga kadudahan ang lihok ug nakit-ang naghupot og tulo ka paketeng may sulod nga gidudahang shabu.

Daling gidakop si Apura nila ni Aparis apan gikatahong milugnot kini ug misuway og ilog sa armas ni Aparis hinungdan nga si Macaranas kinsa maoy back-up mipusil sa walang bitiis ni Apura aron kini mapugngan.

Ang suspek daling gidala sa Cebu City Medical Center alang sa pagpatambal ug gipasakaan kini og kaso kagahapon ngadto sa piskalya.

Nianang sayo pa sa susamang adlaw, usa ka polis sa San Nicolas police station nga si PO1 Francis Lyle Flores ang nasamdan sa iyang kamot human mag-people power ang mga residente dihang ilang gidakop ang usa ka drug suspek nga si Edward Baldesamo alyas Ewar.

Ang buy-bust operation gitumong aron unta sikupon si Baldesamo apan dihang posasan na kini kalit nga midugok ang mga tawo ug gipanglayog ang mga polis hinungdan nga nakaeskapo si Baldesamo dala ang marked money.

Kahinumduman niadtong bulan sa Hunyo, usa ka Field Training Program trainee nga nadestino sa Pardo police station ang gihapsan og bisekleta, gikulata ug diriyot mapusili sa usa ka gidudahang bigtime drug pusher diha sa maong lugar human usab mag-people power ang mga tawo apan ang suspek napusilan sa mga back-up sa polis nianang tungura ug nasikop uban sa usa ka babayeng gidudahang pusher usab.