Upat ka testigos sa murder sa Kano — polis

Kaso sa pagpatay sa usa ka Amerikano diha sa Banawa, Guadalupe ning dakbayan niadtong milabay'ng Lunes 70 porsiyentong makapasaka na og kaso ang kapolisan, sumala pa sa usa ka opisyal.

Si Supt. Pablo Labra sa Criminal Investigation and Intelligence Branch mibutyag sa Banat News nga duna na silay di momenus upat ka mga testigo nga makasuporta sa kasong pagpatay kang Victor Noe,68.

Si Noe ug iyang kapuyong si Catalina Cabanes,35, gibanhigan sa duha ka mga lalaking nagmotorsiklo diin ang backrider niini maoy naghuwat sa gate sa usa ka townhomes sa gikahitaboan nga giadtuan sa mga biktima ug maoy mipusil kang Noe ug kang Cabanes.

Si Cabanes nalandig sa usa ka pribadong tambalanan nga nawad-an og panimuot gumikan sa usa ka samad pinusilan sa iyang walang tampihak.

Matud pang Labra ang maong mga testigo makatabang sa pagpalig-on sa sirkumstansya sa motibong ilang gisubay karon sa imbestigasyon.

Gibutyag ni Labra gawas sa anggulong may kalambigitan ang kustodiya sa kinamanghurang anak ni Cabanes diin ang iyang bana nagbuwag na.

Dunay plano si Noe ug Cabanes matud pa sa kinamaguwangang anak sa naulahi nga dad-onon sila ngadto sa Estados Unidos sunod tuig.

Usa usab sa gitutukan karon sa kapolisan mao ang mga naulahing transaksyon ni Noe kabahin sa iyang mga kabtangan.

Matud pang Labra ning bag-ohay lang mipalit si Noe ug Cabanes ug propriyedad nga nagkantidad og minilyon apan giingong dunay kakuliang nahitabo sa mga transaksyon niini.

Dugang pa ni Labra nga duna na silay lead kabahin kung si kinsa ang posibleng gun for hire nga gisugo pagpapatay kang Noe ug gikatakdang pabuhatan na kini og cartographic sketch.