Shabu, armas ug 2 pusher 'dakpan

Duha ka mga gidudahang drug pushers ang nasikop ug nakuhaan og duha ka armas, mga shabu ug drug paraphernalia atol sa kinalit nga ronda sa Criminal Investigation and Detection Group 7 kagahapon sa buntag diha sa lungsod sa Consolacion.

Ang nangasikop giilang sila si Joseph Gaviola, alyas Bukol hingkod ang panuigon ug Junrey Ingles pulos mga residente sa Phase 1, Mother Ignacia Village sa Pulpogan, Consolacion.

Sumala pa ni SPO1 Delfin Bontuyan nga si Ingles maoy 'street pusher' ni Gaviola, gani naaktuhan kining nagbaligya og pinaketeng gidudahang shabu diha sa dalan nga nagtangkil og usa ka kalibre 357 nga rebolber dihang naatlan sa mga polis.

Ang grupo ni Chief Inspector Fermin Armendares armado sa search warrant nga giluwatan ni RTC Judge Ulric Cañete batok kang Gaviola gumikan sa pagpamaligya niini og gidiling drogas.

Atol sa ronda si Ingles midagan sa sudlonong bahin sa ilang lugar dihang nangabot ang CIDG apan naabtan kini og nadakpan.

Si Gaviola giingong diha sa ikaduhang andana sa ilang balay dihang nanulod ang kapolisan ug kini naaktuhang nagbahig pa sa mga gidudahang shabu.

Matud pang Bontuyan nga tibuok gabii nilang gipanid-an si Gaviola, milakaw kini nianang tungang gabii ug mibalik alas kwatro na sa kaadlawon, gituuhang gikan pa nakapalit og shabu si Gaviola.

Nianang giimbestigar mitug-an kining diha siya nakapalit og shabu sa Sawang Calero ning dakbayan.

Nakuha sa posesyon ni Ingles ang usa ka kalibre .357 rebolber nga may unom ka buhing bala ug holster, 52 ka paketeng pulos may sulod nga gidudahang shabu.

Samtang si Gaviola nakuhaan og usa ka kalibre 45 pistola nga may usa ka magazine nga may sulod nga upat ka buhing bala, siyam ka pakete ug usa ka medium size nga pulos dunay sulod nga gidudahang shabu ug mga gamit pag-repack ingon man cash nga P130.00.