MCWD ipatawag sa konseho

Ipatawag unya sa konseho sa dakyanan sa Sugbo ang mga opisyal sa Metropolitan Cebu Water District (MCWD) aron pagpasabot sa 12 porsiyento nga gipangayo niini nga usbaw sa bayranan sa tubig sugod sa Hulyo.

Matud ni Konsehal Sylvan Jakosalem, chairman sa committee on utilities, nga dako ra ang usbaw nga gipangayo sa MCWD ug makahatag kini og dugang palas-unon sa publiko.

Bisan nga dunay approval gikan sa Local Water Utilities Administration ang water rate increase, si Jakosalem nagkanayon nga miuyon na si Bise Mayor Michael Rama nga ipatawag ang tanang sakop sa MCWD Board alang sa usa ka executive session sunod semana.

Nagkanayon si Jakosalem nga iyang susihon ang charter sa MCWD kun unsay ilang gibasehan sa usbaw sa water rate.

Ang 12 porsiyento nga usbaw motatak na sa water billings unya sa Hulyo diin ang monthly mininum charge moabot ngadto sa P136 sa usa ka panimay kun basehan ang mahurot niini nga 10 cubic meters.

Si MCWD General Manager Armando Paredes nagkanayon nga niadtong Enero pa unta nila ipatuman ang usbaw. Tumong sa pagpatuman sa usbaw mao ang pagsustiner sa operational ug capital expenses.

Nagkanayon si Jakosalem nga bisan dunay public consultation sa miaging tuig, angayan usab masayod ang iyang komitiba ug ang mga sakop sa konseho unsay ilang basehanan.

Kun dili matagbaw si Jakosalem sa pamahayag gikan sa mga MCWD board dili siya magmakuli nga moduso og petition aron kapugngan ang 12 porsiyento nga usbaw sa water rate.

Katapusang increase nga gipatuman sa MCWD niadtong Septembre sa miaging tuig diin 12 porsiyento ang ilang gipatuman.

Kun mapatuman ang usbaw, matud ni Paredes nga maka-finance na sila sa mga in-house projects aron pag-improve sa water supply ug distribution system.