MCPO alerto vs pamomba — hepe

Gihugtan og maayo sa Mandaue City Police Office ang seguridad sa mga vital installations sa dakbayan sa Mandaue nunot sa nanghitabo sa kaulohan nga sunodsunod nga pagpamomba ilabi na sa iyang mga ginsakopan.

Si MCPO Director Sr Supt. Eduardo Catabas nga nahinabi sa Banat News kagahapon sa hapon miingon nga iya nang gimanduan ang iyang mga hepe sa unom ka presinto sa kapolisan sa dakbayan sa Mandaue nga i-doble ang ilang pagka-alerto sa ilang mga kahimanan ug mga sakyanan aron dili kini mabiktima sama sa nahitabo sa kaulohan.

Subay niini, dako ang pagtuo ni Catabas nga panghadlok lamang kini sa mga walhong pundok nga buot mosabotahe sa umaabot nga ASEAN summit dinhi sa nasud ilabi na nga ang Sugbo maoy host sa maong kalihukan.

Apan bisan pa niini, walay kompiyansa ang MCPO sa maong sitwasyon gumikan kay iyang doblehon ang mibantay sa mga vital installation ilabi na ang duha ka taytayan nga nagkutay sa Lapu-Lapu ug Mandaue.

Matud pa ni Catabas nga matag semana siya makigtagbo sa iyang mga hepe sa matag presinto sa kapolisan aron makahatag kini og giya alang sa ilang hugot nga preparasyon sa seguridad sa umaabot nga ASEAN summit.

Tulo na ka adlaw ang milabay gitay-og ang Lipa, Batangas ug Manila og tulo ka sunod nga pagpamomba diin lakip sa gibombahan ang bus sa kapolisan ug kagahapon gibombahan ang usa ka van sa Special Weapons And Tactics sulod sa Camp Bagong Diwa sa National Capital Region Office, ang grupong nangangkon sa maong mga pagpamomba mao ang "Taong Bayan at Kawal."