Tartanilla fest sugod Hunyo 1

Subling ilusad sa kagamhanan sa dakbayan sa Sugbo ang 4th Tartanilla Festival sugod Hunyo 1 nga gitumong aron pagpreserbar sa karaang kultura ug transportasyon sa Sugbo.

Atol sa press conference kagahapon sa buntag gipahibalo ni Konsehal Eduardo Rama, tsirman sa maong kalihukan nga karung tuiga dunay 84 ka mga tartanilla nga nagbiyahian diha sa Duljo ug Pasil ang moapil sa maong kalihukan.

Gibahin ngadto sa duha ka kategoriya ang maong kompetisyon nga mao ang Luho ug Paint Category ang mahimong kampiyon sa matag kategoriya makadawat og tag P15 mil nga ganti ug trophy, P10 mil ang 2nd, P8 mil ang 3rd ug P2 mil ang 4th ug laing P5 mil alang sa mapili nga artist of the year.

Gipasabot ni Rama nga tumong ning maong tinuig nga kalihukan aron mapahinumduman ang mga kutsero sa pagsunod sa tanang mga ordinansa sa siyudad ug aron pagpreserbar sa maong karaan nga transportasyon.

Unya sa Hunyo 11 ang mapili nga top 20 paapilon kini sa civic parade nga himuon atol sa Philippine Independence Day ug ang awarding sa mogawas nga mananaug unya sa Hunyo 12.

Nunot niini, gipahibalo ni Konsehal Jocelyn Pesquera ang pagpahigayon sa inter-barangay drama festival karong Hunyo 9 ug 10.

Dunay walo ka mga entry gikan sa mga barangay sa Cogon Ramos, Guba, Bo. Luz, Mambaling, Punta Princesa, Sambag-2, Sirao ug Talamban ang magtigi sa maong kompetisyon.

Ang mogawas nga kampiyon makadawat og P35 mil ug trophy, P25 mil sa 2nd,P20 mil sa 3rd ug tag P5 mil nga consolation prize.