Kapitan mipusil sa residente

Gipangita karon ang usa ka barangay kapitan sa lungsod sa Sibonga kinsa giingong mipusil sa usa ka residente sa iyang barangay nga giingong nanghasi atol sa gipahigayong disko niadtong besperas sa ilang pista niadtong Biyernes sa gabii.

Samtang laing opisyal usab sa Talisay ang nakapusil og usa ka tanod sa samang gabii ug kasamtangan pang gipangita.

Ang gipangita sa kapolisan giilang si Bagcagong barangay Kapitan Leocadio Cambongga, hingkod ang panuigon ug residente sa nahisgutang barangay.

Samtang kritikal nga milandig sa tambalanan gumikan sa igo sa bala diha sa ulo ug kalawasan ang biktimang si Raymund Cabica alyas Mundo, hingkod ang panuigon residente sa maong barangay.

Si PO2 Ederlino Bacusmo sa pakighinabi sa Banat News mibutyag nga nakit-an nila ni barangay konsehal Mario Timplanza ug sa barangay tanod nga si Gregorio Mangubat ang insidente.

Matud pa nga nagubot ang gipahigayong disko diha sa basketbolan diin ang nalambigit mao ang biktima ug laing mamaylihay hinungdan nga giduol kini ni Cambongga ug mga opisyal sa barangay uban sa mga tanod.

Apan gikatahong ang kapitan na hinuon ang giatake sa biktima hinungdan nga gipusil kini ni Cambongga sa ulo ug sa lawas, human niini daling miikyas ang suspek samtang gidala sa tambalanan si Cabica.

Sa laing bahin sa samang gabhiuna, usa ka konsehal sa barangay Jaclupan dakbayan sa Talisay ang mipusil sa tanod nga mibutang kaniya sa logbook nga late pagsulod sa trabaho.

Si Konsehal Fernando Rabago giingong kalma kaayong milakaw palayo sa barangay hall human pusila si Timoteo Raganas, 40, tanod sa maong barangay diha sa liog ug duha ka bukton.

Matud pa ni PO2 Leandro Azarcon sa pakighinabi sa Banat News nga nasuko si Rabago kang Raganas gumikan sa pagmarkang absent sa biktima dihang na-late pagsulod sa trabaho ang suspek.

Gikatahong gibirahan sa tangkugo ang biktima ug dihang nahagba giusban kini pagpusil sa konsehal diha sa bukton.

Ang kauban sa tanod nga si Edwin Pantojan mao nay nagdala sa biktima sa Chong Hua Hospital samtang yanong milakaw ang suspek palayo sa dapit. -Uban sa taho nila ni Brenda Batuto ug Rey Pasaporte